Sipas njoftimeve të Radios së Jashtme të Kinës, më 17 shkurt, Kuvendi i Kosovës miratoi deklaratën e pavarësisë, duke shpallur se Kosova u bë një vend i pavarur sovran. Komuniteti ndërkombëtar bëri reagime të ndryshme për shpalljen e pavarësisë së Kosovës.

Me kërkesën e Rusisë dhe të Serbisë, Këshilli i Sigurimit i OKB-së zhvilloi më 17 shkurt një mbledhje urgjente me dyer të mbyllura. Pas mbledhjes, në një konferencë shtypi, përfaqësuesi i Panamasë në OKB Arias, vendi i të cilit është kryetar i radhës i Këshillit të Sigurimit në këtë muaj, u bëri thirrje palëve të ndryshme përkatëse që të përmbahen në problemin e Kosovës për të shmangur konfliktet e drejtpërdrejta.

Pas kësaj konference shtypi, sekretari i OKB-së Ban Ki-moon publikoi një deklaratë, ku u bëri thirrje palëve të ndryshme të zbatojnë premtimet e mëparshme, duke shmangur çdo veprim dhe shprehje që rrezikon paqen dhe sigurimin e Kosovës dhe të rajonit përreth saj. Në këtë deklaratë theksohet se para marrjes së urdhrit nga Këshilli i Sigurimit i OKB-së, misioni i posaçëm i OKB-së në Kosovë do të vazhdojë ta konsiderojë rezolutën nr. 1244 të këtij këshilli si kornizën e ligjshme të detyrës së tij dhe do të vazhdojë zbatimin e kësaj detyre sipas zhvillimit të gjendjes.

Ministria e Punëve të Jashtme e Rusisë bëri një deklaratë, në të cilën thuhet se shpallja e njëanshme e pavarësisë së Kosovës dëmton sovranitetin e Serbisë, Kartën e OKB-së, parimet dhe frymën e rezolutës nr. 1244 të Këshillit të Sigurimit. Deklarata kërkon nga OKB-ja të marrë masa për rifillimin e procesit të zgjidhjes politike të problemit të Kosovës.
Ministri i Jashtëm i Rumanisë Cioroianu theksoi se Rumania nuk do të ndryshojë qëndrimin e kundërshtimit ndaj shpalljes së njëanshme të pavarësisë së Kosovës.

Departamenti amerikan i Shtetit u bëri thirrje palëve të ndryshme përkatëse që të përmbahen për të shmangur ndodhjen e veprimeve provokuese. Presidenti amerikan Bush u shpreh se SHBA-ja do të vazhdojë bashkëpunimin me vendet aleate për të siguruar që të mos ndodhin incidente të dhunshme gjatë procesit të pavarësisë së Kosovës.

Përfaqësuesi i lartë i BE-së për politikat e jashtme dhe të sigurimit Solana bëri një deklaratë, në të cilën thuhet se stabiliteti në Kosovë dhe në rajonin e Ballkanit është i rëndësishëm. Palët e ndryshme përkatëse duhen të ndërmarrin veprime të përgjegjshme. (Çang Çuo) (Artan)