Federata Shqiptare e Futbollit ka publikuar listën me 24 futbollistë që do të vëzhgohen nga trajneri Ari Han në zborin 10 ditor të Antalias. Në mungesë të njohurive për lojtarët shqiptarë nga ana e trajnerit holandez, lista është hartuar nga zëvendës presidenti i Federatës Bujar Kasmi. Ashtu siç pritej, shumica e emrave që do të jenë pjesë e delegacionit kuqezi, thuajse nuk kanë asnjë lidhje me ekipin kombëtar. Shumë prej tyre janë provuar në të shkuarën dhe nuk kanë bindur askënd për të mbajtur veshur fanelën kuqezi. Përveç portës, ku bëjnë pjesë tre emra që nuk mund të kontestohen për asnjë moment, qoftë edhe për moshën e tyre, në repartet e tjerë bëhet fjalë për futbollistë të stërprovuar që nga koha e Hans Peter Brigel e më tej me Oto Bariç. Kështu, Tefik Osmani dikur ishte një lojtar titullar në përfaqësuese, por mungesa e formës fizike, bëri që emri i tij të harrohej jo vetëm në kombëtare, por edhe në skuadrat elitare të kampionatit. Madje ai ka qenë protagonist më shumë për çështjet jashtë fushe sesa për formë të mirë brenda saj. Ndërsa në mbrojtje ndodhen edhe lojtarë si Ansi Agolli, i cili figuron me një skuadër të kategorisë më të ulët të futbollit finlandez. Në mesfushë, janë thirrur lojtarë që prej kohësh e veshin fanelën kuqezi vetëm në zboret jashtë vendit. Kështu, Bledar Shkëmbi nuk gëzon një formë të mirë as në kampionat, ndërkohë që për Paulin Dhëmbin duket shumë vonë për ta provuar në përfaqësuese. I tillë duket edhe sulmi, ku duket e pakuptimtë thirrja e Vioresin Sinanit, në një kohë që sulmuesi shkodran duhej të zhvillonte fazën përgatitore me Vllazninë, trajneri i së cilës ka besuar gjithmonë më shumë se ata të kombëtares tek sulmuesi shkodran. Ndërkohë që një tjetër emër i pakontestueshëm është ai i talentit shqiptar të Shtutgartit, Shaban Ismaili, i cili mund të jetë një alternativë e shkëlqyer në sulmin kuqezi. Ndërsa Sebino Plaku do të mungojë në këtë grumbullim.

("Gazeta shqiptare", 10. 01. 2008).