Sipas njoftimeve të Radios së Jashtme të Kinës, më 23 shkurt, Ministria e Jashtme e Polonisë i dorëzoi zyrtarisht ambasadës amerikane në Poloni një notë diplomatike, në të cilën shpreh miratimin që të rifillojë bisedimet me SHBA-në për problemin e ndërtimit të bazës së mbrojtjes kundër raketave.

Në komunikatën e publikuar po atë mbrëmje, Ministria e Jashtme e Polonisë deklaroi që të gjitha marrëveshjet përkatëse duhet të garantojnë forcimin e sigurisë së Polonisë, të SHBA-së dhe të komunitetit ndërkombëtar. Sipas njoftimeve të tjera, ambasadori i Çekisë në Rusi Miroslav Kostelka u shpreh ditët e fundit se marrëdhëniet dypalëshe midis Çekisë dhe Rusisë nuk do të ndikohen nga ndërtimi prej SHBA-së në Çeki i bazës së mbrojtjes me sistem radari kundër raketave.

Më 23 shkurt, rezidenca e kryeministrit të Anglisë pohoi se Anglia dhe SHBA-ja po bëjnë konsultime të nivelit të lartë për të diskutuar mundësinë e dislokimit në Angli të sistemit të mbrojtjes kundër raketave balistike. (Shyguan)