Sipas njoftimeve të Radios së Jashtme të Kinës, më 28 gusht, presidenti i Republikës së Serbisë Boris Tadiç dhe kryeministri i këtij vendi Vojislav Koshtunica zhvilluan takime të veçanta në Beograd me anëtarin e Këshillit të Shtetit të Kinës, z. Tang Jiaxuan që ndodhet për vizitë në Serbi.

Gjatë takimit, Tang Jiaxuani u shpreh se pala kineze i kushton rëndësi të madhe zhvillimit të marrëdhënieve me Serbinë dhe dëshiron të bëjë përpjekje të përbashkëta me të për të ngritur vazhdimisht nivelin e zhvillimit të marrëdhënieve dypalëshe dhe të bashkëpunimit në fusha të ndryshme. Tang Jiaxuani ritheksoi se pala kineze do të respektojë si gjithmonë sovranitetin dhe tërësinë territoriale të Serbisë dhe e përkrah zgjidhjen e problemit të Kosovës nëpërmjet bisedimeve sipas rezolutës përkatëse të OKB-së dhe normave të marrëdhënieve ndërkombëtare.

Tadiçi tha se Kina po luan një rol gjithnjë e më të rëndësishëm në çështjet ndërkombëtare dhe se zhvillimi i shpejtë i ekonomisë kineze ka krijuar shanse të reja për zhvillimin e serbisë. Serbia do të bëjë të gjitha përpjekjet për të thelluar më tej marrëdhëniet miqësore me Kinën, duke forcuar bashkëpunimin e gjithanshëm në fusha të ndryshme.

Nga ana e tij, Koshtunica u shpreh se Serbia e Kina kanë shumë interesa të përbashkët dhe mbajnë qëndrime të ngjashme për shumë probleme të mëdha ndërkombëtare, të cilat janë nyja të rëndësishme të bashkëpunimit midis dy vendeve.

Tadiçi dhe Koshtunica ritheksuan gjithashtu se pala serbe do të vazhdojë t'i përmbahet me këmbëngulje politikës së "një Kine" dhe mbështet çështjen e ribashkimit të Kinës.

Siç mësohet, përveç Serbisë, z. Tang Jiaxuan do të bëjë vizita edhe në Maqedoni, Malin e Zi, Slloveni dhe Kroaci.(Çan Yean)