Më 8 gusht në mesditë, kryetari i shtetit i Kinës Hu Jintao shtroi në Pallatin e Madh Popullor një banket madhështor mirëseardhjeje për mysafirët e lartë të ardhur për të ndjekur Lojërat e 29-ta Olimpike të Pekinit.

Në banket, kryetari Hu Jintao mbajti një fjalim, ku ai u shprehu falënderime të gjithë njerëzve që kanë dhënë kontribut për Lojërat Olimpike të Pekinit.

"Gjatë kërkesës e përgatitjes për Lojërat Olimpike të Pekinit, qeveria dhe populli kinez kanë gjetur ndihmën e sinqertë të qeverive e popujve të vendeve të ndryshme dhe kanë gjetur përkrahjen e madhe nga Komiteti Olimpik Ndërkombëtar dhe nga familja e madhe olimpike ndërkombëtare. Këtu ju shpreh juve dhe nëpërmjet jush të gjithë njerëzve që kanë dhënë kontribut për Lojërat Olimpike të Pekinit falënderime të sinqerta!"

Hu Jintao u shpreh se lëvizja olimpike ndërkombëtare ka mbledhur njerëzit e vendeve të ndryshme, të kombeve të ndryshme dhe të kulturave të ndryshme, ka shtuar njohjen reciproke dhe miqësinë midis popujve të vendeve të ndryshme të botës dhe ka dhënë kontribut të rëndësishëm për nxitjen e çështjes së madhe të paqes dhe të zhvillimit të njerëzimit.

Lojërat Olimpike të Pekinit janë jo vetëm një rast për Kinën, por edhe për botën.

Hu Jintao tha se qysh vitit 2001, kur kërkesa e Pekinit për organizimin e Lojërave Olimpike arriti sukses, qeveria dhe populli kinez kanë përmbushur me seriozitet premtimet serioze ndaj bashkësisë ndërkombëtare dhe kanë bërë me të gjitha forcat punët e ndryshme përgatitore. Ai shprehu bindjen se, me përkrahjen e Komitetit Olimpik Ndërkombëtar dhe të familjes së madhe olimpike ndërkombëtare, Lojërat Olimpike të Pekinit do të bëhen lojëra olimpike me karakteristika dhe me nivel të lartë.

Kryetari i Komitetit Olimpik Ndërkombëtar Rog, kryetari i nderit i këtij komiteti Samaranç, si dhe mbi 80 mysafirë të lartë, duke përfshirë edhe kryeministrin e Shqipërisë Sali Berisha, morën pjesë në këtë banket mirëseardhjeje. (Du) (Artan)