Më 24 tetor të vitit 2007, në orën 18.05, Kina lëshoi me sukses satelitin "Chang Ë Nr. 1" me raketën transportuese "Changzheng" nga qendra e lëshimit të satelitëve Xichang. "Chang Ë Nr. 1" është sateliti i parë për hulumtimet në Hënë i studiuar dhe i prodhuar nga Kina. Lëshimi i suksesshëm i satelitit "Chang Ë Nr. 1" shënon që projekti kinez i hulumtimit të Hënës hodhi një hap të rëndësishëm.

32 këngët që mori sateliti "Chang Ë Nr. 1" u transmetuan me sukses nga Hëna në Tokë më 21 shkurt të vitit 2008. Zëvendëssekretari i Qendrës së projektit të hulumtimeve në Hënë Zhang Rongqiao tha se këto 32 këngë u përzgjodhën pas vlerësimit në Komitetin e Industrisë së Shkencës së Mbrojtjes të Kinës, CCTV dhe Shoqatën e muzikantëve kinezë, si edhe në bazë të votimit të masave popullore.

Kënga që po dëgjoni, titullohet "E dua kombin kinez", ajo është kompozuar nga Xu Peidong dhe vargjet janë shkruar nga Qiao Yu. Melodia e kësaj kënge shfrytëzon elementet e muzikës së pakicave kombëtare. Kjo këngë tregon dashurinë e kombësive të ndryshme për atdheun. Pas këngës "E dua kombin kinez", le të shijojmë së bashku me ju këngën "I këndojmë atdheut", tekstin dhe muzikën e së cilës i ka bërë Wang Shen.

Në këngë thuhet: "I këndojmë atdheut tonë të dashur, që do të shkojë drejt lulëzimit dhe fuqizimit." Melodia e këngës është e fuqishme dhe fjalët e saj janë shumë prekëse. Kjo këngë e përhapur gjerësisht dhe e krijuar në vitet e para pas shpalljes së Kinës së Re pasqyron gëzimin e njerëzve për krijimin e Kinës së Re dhe shpreh aspiratën e tyre të bukur për të ardhmen e atdheut. Kjo këngë u interpretua edhe në ceremoninë e hapjes së Lojërave Olimpike të Pekinit, gjë që tregon rëndësinë e saj në historinë muzikore të Kinës së Re.

Shumë nga 32 këngët që ka marrë sateliti "Chang Ë Nr. 1" janë me temën e dashurisë për atdheun. Këngët "E duam kombin kinez" dhe "I këndojmë atdheut" që sapo ndoqët, shprehin dashurinë e njerëzve për atdheun në periudhën e paqes. Më poshtë do të dëgjojmë këngën "Atdheu im" të periudhës së luftës kundër pushtuesve amerikanë në ndihmë të Koresë së Veriut.

Kjo këngë, që është edhe kolona zanore e filmit artistik "Beteja në malin Shangganling", është krijuar nga kompozitori i njohur kinez Liu Zhi dhe tekstin e ka shkruar poeti i njohur Qiao Yu. Kënga shpreh dashurinë e pakufishme të ushtarëve vullnetarë kinezë për atdheun dhe vendlindjen, si dhe heroizmin e tyre. Fjalët e këngës janë të përzemërta, të thjeshta, të dashura dhe të gjalla. Kur e dëgjojmë këtë këngë tani në kohë paqësore, jemi shumë mirënjohës për jetën e sotme të lumtur.

Vendi ynë filloi të zbatojë reformën e hapjen ndaj botës që në fund të viteve '70, kënga "Historia e pranverës" tregon një ngjarje të vitit 1979. Ndërsa në vitin 1992 shoku Ten Hsiao Pin mbajti një fjalim gjatë inspektimit në jug të Kinës, duke nxitur thellimin e mëtejshëm të reformës e hapjes.

Në këngë thuhet: "Në pranverë të vitit 1979, një i moshuar bëri një rreth në bregun e Detit të Kinës Jugore, ngrihen njëri pas tjetrit qytetet. Në pranverën e vitit 1992, ky i moshuar shkroi një vjershë në bregun e Detit të Kinës Jugore, ka ardhur hovi i madh pranveror në Kinë dhe janë ngritur velat e marshimit përpara."

Tani le të shijojmë së bashku me ju këngën motër të këngës "Historia e pranverës" me titull "Hyjmë në epokën e re", sfondi i së cilës janë sukseset e mëdha të arritura gjatë reformës e hapjes.

Kjo këngë pasqyron vendosmërinë dhe besimin e kolektivit drejtues të partisë e të shtetit për ndërtimin e vendit të fuqishëm modern socialist. Tërë këngën e përshkon fryma patriotike, ndershmëria dhe energjia.

Gjatë reformës e hapjes ndaj botës së jashtme, në fshatin kinez kanë ndodhur ndryshime kolosale. Niveli i jetesës së fshatarëve është ngritur dukshëm, kudo në fshat vihet re një tablo e gjallë. Tani le të dëgjojmë këngën "Në fushën e shpresës", që pasqyron pikërisht këto ndryshime të thella.

Në këngë thuhet: "Vendlindja jonë ndodhet në fushën e shpresës, tymi ngrihet mbi shtëpitë e reja, përroi gurgullon pranë fshatit të bukur." Me melodinë dhe fjalët e bukura kënga përshkruan pamjen plot gjallëri të fshatit të ri kinez.

Kina ka territor të madh dhe burime të pasura, mjedisi gjeografik natyror është shumë i pasur. Lumi Jance i Kinës, 6300 kilometra i gjatë, është lumi më i madh në Kinë e në Azi dhe lumi i 3-të në botë. Tani le të shijojmë së bashku "Këngën për lumin Jance".

Kjo këngë është kënga e filmit dokumentar madhështor të Kinës "Biseda rreth lumit Jance", të përhapur gjerësisht në vitet '80 të shekullit të kaluar. Ajo i këndon madhështisë dhe bukurisë së lumit Jance dhe shpreh dashurinë për të. "Kënga për lumin Jance" ka forcë të madhe prekëse artistike.

Kënga që po ndiqni titullohet "Himni i Lumit të Verdhë". Në Kinë Lumi i Verdhë është i njohur ashtu si edhe Janceja, ai është lumi i 2-të për nga madhësia në Kinë e i 5-ti në botë dhe konsiderohet si "lumi nënë i kombit kinez".

Kjo këngë është një himn që i këndon kombit kinez. Lumi i Verdhë madhështor si arterie e jetës së kombit kinez, gurgullon në tokën e lashtë të Kinës dhe ushqen dhjetëra milionë bij e bija në dy brigjet e tij, duke hedhur bazë të shëndoshë për qytetërimin 5-mijëvjeçar të vendit.

Lumi Jance dhe Lumi i Verdhë burojnë nga rrafshnalta Qinghai-Tibet. Tani le të ndjekim këngën me titull "Rrafshnalta Qinghai-Tibet", e cila u këndon panoramave të bukura të atjeshme.

Rafshnalta Qinghai-Tibet, e quajtur "Çatia e botës", është rrafshnalta më e lartë në botë, lartësia e saj mbi nivelin e detit është më shumë se 4 mijë metra. Atje ka male, lumenj, liqene, akullnaja dhe bukuri të tjera natyrore, ku jetojnë njerëzit e thjeshtë dhe zemërmirë, të cilët punojnë tokën, duke krijuar kulturën e shkëlqyeshme të kombësive.

Të dashur dëgjues, në programin e sotëm ju paraqita disa nga 32 këngët që ka marrë sateliti "Chang Ë Nr. 1", të cilat i këndojnë atdheut. Në fund të programit të sotëm muzikor le të shijojmë së bashku me ju këngën "Dëshirojmë që të jemi gjithmonë bashkë". Teksti i këngës është një poezi e poetit të madh të dinastisë Tang, Su Shi.

Kjo këngë, nëpërmjet hënës së plotë e hënës si drapër, pasqyron gëzimin e mbledhjes dhe pikëllimin e ndarjes së njerëzve dhe dëshirën e tyre për jetën e bukur. Lëshimi me sukses i satelitit "Chang Ë Nr. 1" ka treguar zhvillimin e vrullshëm të astronautikës në Kinë, ndërsa 32 këngët që ka marrë sateliti shprehin gjithashtu urimet e njerëzve për të ardhmen e çështjes astronautike të Kinës.  (Pina)