Angola ka qenë një vend që ka vuajtur shumë nga trazirat e luftës dhe nga lufta shumë angolezë janë gjymtuar, gjë që u ka sjellë atyre vuajtje të mëdha shpirtërore. Në vitin 2002, pas përfundimit të luftës civile, Angola filloi rindërtimin. Në të njëjtën kohë, po zhvillohet një vepër tjetër e rëndësishme. Cila është kjo vepër? Korrespondenti i radios sonë i bëri një vizitë për të gjetur përgjigje për këtë sekretarit të përgjithshëm të Komitetit Paralimpik të Angolës Antonio Luz.

Zoti Antonio Luz është tani sekretari i përgjithshëm i Komitetit Paralimpik të Angolës dhe kryetari i delegacionit paralimpik angolas që po merr pjesë në Lojërat Paralimpike të Pekinit. Komiteti Paralimpik i Angolës u formua në vitin 1994 dhe Antonio Luzi është një nga krijuesit e këtij komiteti. Ai tha se nga lufta e gjatë civile, shumë angolezë janë gjymtuar në trup. Qeveria e Angolës u ka kushtuar vëmendje të madhe këtyre njerëzve. Sporti është bërë mënyra më e mirë e mjekimit për ta.

"Me përkrahjen e qeverisë, ne kemi mbledhur këta njerëz me aftësi të kufizuar fizike për të zhvilluar stërvitje sportive. Shumë shoqata të njerëzve me aftësi të kufizuar fizike të Angolës janë përgjigjur në këtë mënyrë dhe si rrjedhim shumë njerëz me aftësi të kufizuar fizike janë integruar shumë mirë në shoqëri."

Nga sporti, shumë angolas me aftësi të kufizuar fizike filluan të kenë plot shpresë për jetën. Zoti Antonio Luz dha një shembull të tillë. Në Lojërat Paralimpike të Athinës të vitit 2004, sportisti me aftësi të kufizuara fizike Noze Sayavo fitoi 3 medalje të arta në vrapimin 100 metra, 200 metra dhe 400 metra të shkallës T11 dhe theu rekordin paralimpik. Kur u kthye në atdhe, qindra e mijëra angolezë e pritën atë ngrohtësisht. Noze Sayavo u bë hero i Angolës. Kurse para zhvillimit të stërvitjes sportive, ai kishte një jetë tjetër.

"Ai ishte pesimist për të ardhmen e vet, sepse familja e tij jetonte vetëm me pensionin ushtarak të të atit. Kur Sayavo filloi të merret me stërvitje sportive, filloi të ketë rast të marrë pjesë në lojërat paralimpike. Ndoshta, ai vetë nuk e dinte se mund të arrijë suksese të mëdha në garat sportive. Tani, sporti i ka dhënë vitalitet jetës së tij."

Zoti Antonio Luz tha se sukseset e arritura nga Sayavo kanë nxitur shumë sportistë me aftësi të kufizuar fizike në Angolë. Edhe shteti filloi të ketë plot besim për zhvillimin e çështjes sportive të njerëzve me aftësi të kufizuar fizike. Tani, sporti i njerëzve me aftësi të kufizuar fizike në Angolë është zhvilluar shumë shpejt, sidomos atletika. Gjithashtu, në Angolë, ka 14 klube të basketbollit në karrige me rrota dhe deri tani janë organizuar 4 kampionate kombëtare të basketbollit në karrige me rrota.

Pas përfundimit të luftës në vitin 2002, nuk ishin pastruar mirë minat në shumë zona të Angolës dhe, si rrjedhim, shumë fëmijë hasën në to dhe janë bërë njerëz me aftësi të kufizuara fizike. Për këtë, pak kohë më vonë, Angola nisi "Planin e sportit të fëmijëve me aftësi të kufizuara fizike" për të mjekuar plagët shpirtërore të këtyre fëmijëve. Sipas këtij plani, një fëmijë i shëndetshëm ndihmon një fëmijë me aftësi të kufizuar fizike, në mënyrë që fëmijët me aftësi të kufizuara fizike të integrohen më mirë në shoqëri.

"Për shembull, ne gjejmë një fëmijë të shëndetshëm 10 deri 12-vjeçar si vëlla ose motër të një fëmije 6 a 7 vjeçar me aftësi të kufizuar fizike. Kështu, fëmijët me aftësi të kufizuar fizike mund të gjejnë ndihmë nga fëmijët e shëndetshëm dhe këta mund të mësojnë si të respektojnë fëmijët me aftësi të kufizuara fizike dhe t'i ndihmojnë ata të kapërcejnë vështirësitë e ndryshme."

Tani në Angolë, si qeveria, dhe bashkitë vendore, i kushtojnë shumë rëndësi çështjes sportive të njerëzve me aftësi të kufizuara fizike. Në Angolë ka 18 provinca dhe në çdo provincë ka një përfaqësi të Komitetit Paralimpik të Angolës. Përveç kësaj, shumë sportistë të shëndetshëm janë bërë trajnerë ose udhërrëfyes të sportistëve me aftësi të kufizuara fizike.

Duke folur për Lojërat Paralimpike të Pekinit, zoti Antonio Luz tha se ai ka marrë pjesë shumë herë në Lojërat Paralimpike dhe se Lojërat Paralimpike të Pekinit i kanë lënë një përshtypje të thellë. Ai shprehu mendimin se Lojërat Paralimpike të Pekinit do të kurorëzohen me sukses.

"Ne i falënderojmë Komitetin Paralimpik të Kinës dhe Komitetin Paralimpik Ndërkombëtar që kanë bërë përpjekje dhe shpresoj se të gjitha vendet do të tregojnë nivelin e tyre në Lojërat Paralimpike të Pekinit. Fitoret janë jo vetëm të sportistëve që fitojnë medalje, por janë edhe të të gjithë njerëzve që vijnë në stadiumet e pallatet sportive."

Sporti nuk mund t'i mjekojë njerëzit me aftësi të kufizuar fizike, por mund t'i ndihmojë ata të kapërcejnë pengesat e ndryshme dhe të zhvillojnë potencialin e tyre. Zoti Antonio Luz tha se sportistët angolas me aftësi të kufizuar do të marrin pjesë aktivisht në veprimtari të ndryshme sportive ndërkombëtare dhe se ai vetë do të harxhojë më shumë kohë për çështjen sportive të njerëzve me aftësi të kufizuar fizike. (Du) (artan)