"Por, pas dëmtimit, unë vura re sportin e basketbollit me karrocë. Në këtë lloj sporti, si në kohën e stërvitjes, ashtu edhe në ndeshje, unë përpiqesha me të gjitha forcat. Gjatë studimeve në universitet unë harxhoja çdo ditë 3 orë në stërvitje basketbolli dhe një orë për not?Më në fund kuptova se jam një sportiest shumë i mirë."

"Më vonë unë u diplomova në universitet dhe gjeta një punë. Kështu unë luaja basketboll, punoja, pastaj u martova dhe linda edhe fëmijë, bleva edhe shtëpi, kam bërë të gjitha ato që bëjnë njerëzit normalë? Dhe të gjitha këto, jeta sportive e sportistit me aftësi të kufizuar fizike, më kanë nxitur të eci përpara."

Të dashur dëgjues, sapo ju fola për historinë e anglezit Filip Kraven, i cili ka lindur në vitin 1950, është marrë me sporte si basketbolli me karrocë, noti e pingpongu, dhe ka marrë pjesë si basketbollist me karrocë në pesë Lojërat Paralimpike nga viti 1972 deri në vitin 1988. Tani ai është kryetari i Komitetit Paralimpik Ndërkombëtar dhe njëkohësisht anëtar i Komitetit Olimpik Ndërkombëtar. Nga kontributi i dhënë prej tij për lëvizjen paralimpike, ai fitoi në vitin 2005 titullin e Kalorësit.

Lojërat e 13-ta Paralimpike do të hapen së shpejti në Pekin. Për punën përgatitore të këtyre Lojërave kryetari i Komitetit Paralimpik Ndërkombëtar, kalorës Filip Kraven, i dha një intervistë korrespondentes së Radios sonë.

"Premtimet" u kthyen në "vepra"

Kraveni u shpreh: "Kryetari i shtetit i Kinës Hu Jintao u shpreh hapur se Lojërat Olimpike të Pekinit dhe Lojërat Paralimpike të Pekinit do të organizohen njëlloj të shkëlqyeshme. Tani premtimet janë kthyer në vepra. Ne çdo ditë mund të shohim shumë veprime që na tregojnë se të dyja Lojërat do të jenë patjetër njëlloj të shkëlqyeshme."

Kraveni tha gjithashtu:

"Që nga ajo natë e shuarjes së zjarrit të shenjtë të Lojërave Olimpike të Pekinit, organizatorët filluan ta shndërrojnë Pekinin në 'qytetin e Lojërave Paralimpike'. Mënyra e shndërrimit midis dy Lojërave është e paparë në histori."

Kraveni e përshkroi fshatin paralimpik të Pekinit me shprehjen: "Më i miri në histori", ashtu siç e përshkroi edhe kryetari i Komitetit Olimpik Ndërkombëtar Rog. Ai tha se organizatorët e kanë kuptuar me të vërtetë se "sportistët janë më të rëndësishmit."

Sportistët e Lojërave Paralimpike janë shumë "të mëdhenj"

Zoti Kraven shprehu bindjen se garat e ndeshjet e Lojërave Paralimpike do të zhvillohen me siguri njëlloj të shkëlqyeshme si ato të Lojërave Olimpike.

Kraveni theksoi se Lojërat Paralimpike janë gara e ndeshje me nivel shumë të lartë konkurrimi. Sportistët me gjymtyrë artificiale ose me karrocë, kur të vrapojnë, nuk do të jenë shumë më të ngadalshëm se Usain Bolti i Xhamajkës, por ata bëjnë patjetër më shumë përpjekje se sportistët normalë. Sportistët me aftësi të kufizuar fizike kanë vërtetuar se ata dhe sportistët pjesëmarrës në Lojërat Olimpike janë njëlloj të mëdhenj, ashtu siç kanë vepruar pingpongistja polake Natalia Partyka dhe të tjerë, që morën pjesë në Olimpiadën e Pekinit. Por Kraveni bëri të ditur se kjo nuk është një gjë e re në histori.

Ai tha: "Në vitet '80 - '90 të shekullit të kaluar dy qitës me aftësi të kufizuar fizike morën pjesë në Lojërat Olimpike. Në vitet e para të shekullit të kaluar ka pasur edhe sportistë me aftësi të kufizuar fizike që fituan medalje të arta në garat gjimnastikore të Olimpiadave."

Kraveni pret edhe shfaqjet e larmishme të delegacionit paralimpik kinez. Në disa Paralimpiada të kaluara paraqitja e delegacionit kinez i ka lënë përshtypje shumë të mirë. Kur përmendi ambasadorin paralimpik në mbarë botën, sportistin kinez Hou Bin, që fitoi tri medalje të arta në kërcimin së larti në tri Paralimpiada, Kraveni kishte shumë për të thënë.

"Fakti që Hou Bini ka prekur të tjerët, vjen jo vetëm nga sukseset e tij sportive, por edhe nga përfaqësimi i tij në të gjitha qarqet sportive, jo vetëm te ato të sportistëve me aftësi të kufizuar fizike."

Pret "stadiumin me plot shikues"

Lidhur me vëmendjen e madhe të kinezëve për Paralimpiadën e Pekinit zoti Kraven është shumë i kënaqur.

"Ne jemi të bindur se një milion e 600 mijë bileta të Paralimpiadës së Pekinit do të shiten të gjitha dhe stadiumet e pallatet e sportit do të mbushen plot me shikues."

Më në fund zoti Kraven i ftoi dëgjuesit e Radios së Jashtme të Kinës dhe të gjithë popullin kinez ta ndjekin me vëmendje këtë Paralimpiadë, për arsyen shumë të thjeshtë se ajo do të jetë një takim sportiv shumë i shkëlqyer.

Ju flet Radio e Jashtme e Kinës. Të dashur dëgjues, ndoqët reportazhin me titull: "Kryetari i Komitetit Paralimpik Ndërkombëtar Filip Kraven tha: 'Lojërat Olimpike dhe Lojërat Paralimpike do të jenë njëlloj të shkëlqyeshme'." (Drita-Daming)