"Tungjatjeta, të dashur miq dhe dëgjues të Radios së Jashtme të Kinës! Unë jam Hou Bin. Më quajnë 'Ambasador figurativ' i lojërave paralimpike. Mua më duket se Lojërat Paralimpike të Pekinit të vitit 2008 do të jenë një pikënisje e re historike e çështjes së njerëzve me aftësi të kufizuar fizike në Kinë, sepse nëpërmjet këtyre lojërave paralimpike që janë një arenë e madhe veprimi, më tepër njerëz do t'i kushtojnë vëmendje këtij grupi shoqëror."

Hou Bini, ky burrë që quhet "Ambasador figurativ" i lojërave paralimpike, do të jetë një nga sportistët pjesëmarrës në Lojërat Paralimpike të Pekinit, për të cilin do të flasim në emisionin e sotëm. Si atlet i kërcimit së larti për meshkuj të disiplinës F42, ai korri suksese të shkëlqyera, duke fituar tri herë medalje të arta në lojërat paralipike, përkatësisht në vitin 1996 në Atlantë, në vitin 2000 në Sidnei dhe në vitin 2004 në Athinë. Në të tri herët, Hou Bini mori pjesë në lojërat paralimpike me ndihmën e një proteze për këmbë. Këmbën e majtë ai e humbi në moshën 9-vjeçare si pasojë e një aksidenti hekurudhor. Në vitin 1992, Hou Bini, që ëndërronte të bëhej piktor, hyri në rrugën e sportit, duke u frymëzuar nga njoftimet në televizion për lojërat paralimpike. Asokohe atij nuk i shkonte ndër mend se këtë rrugë ai do ta vazhdonte për 15 vjet. Gjatë këtyre 15 vjetëve, ai fitoi jo vetëm medalje të arta, por edhe miqësinë e të tjerëve. Ai u përpoq gjithmonë edhe për të propaganduar çështjen e njerëzve me aftësi të kufizuar fizike, duke shfaqur shpresën e vet se më tepër njerëz do t'i kushtojnë vëmendje kësaj çështjeje dhe do të tregojnë kujdes për sportet e njerëzve me aftësi të kufizuar fizike.

"Gjëja që më prek më shumë është se si ne, ashtu edhe sportistët e Evropës dhe të Amerikës, tregohemi si miq edhe në fushën e garave të lojërave paralimpike. Është e vërtetë se sa herë që mbarojnë garat, ne përqafohemi si miq dhe i shprehim urime njëri-tjetrit. Unë shpresoj se më tepër njerëz do të tregojnë kujdes për çështjen e njerëzve me aftësi të kufizuar fizike dhe për ndeshjet e garat e tyre në lojërat paralimpike të Pekinit, të cilat do t'ju duken shumë interesante. Besoj se sportistët në lojërat paralimpike do t'u lënë gjithmonë spektatorëve buzëqeshje, paravarësisht nëse e fitojnë apo e humbin garën."