Graham Bool me karakter të hapur dhe shumë humor është një gazetar nga Anglia. Ai menaxhon në mënyrë të pavarur një organ informativ të emërtuar me emrin e tij. Ndryshe nga gazetarët e tjerë, ai është jo vetëm njoftues i Lojërave Paralimpike të Pekinit, por edhe pjesëmarrës në shumë paralimpiada. Ai tha:

"Si basketbollist anglez në karrige me rrota, unë kam marrë pjesë në 3 Lojëra Paralimpike, të vitit 1972 në Gjermani, të vitit 1976 në Kanada dhe të vitit 1980 në Holandë. Unë gjithsej kam konkurruar për Anglinë 14 vjet."

Pas largimit nga sporti, Bool-i e ndryshoi profesionin dhe u bë gazetar, duke marrë pjesë në njoftimet e disa Lojërave Paralimpike, duke kaluar nga pjesëmarrës në njoftues të tyre dhe duke gjetur kënaqësinë e tij gjatë njoftimeve. Ai dëshiron të bëjë njoftime edhe në vitin 2012 në Lojërat Paralimpike të organizuara në atdheun e tij. Ai tha me krenari:

"Hera e parë që kam njoftuar për Lojërat Paralimpike ka qenë në vitin 1992 në Barcelonë, pastaj njoftova edhe Lojërat Paralimpike të Atlantës, Sidneit dhe Athinës. Kësaj here, kam ardhur në Pekin dhe, në qoftë se ka mundësi, kam dëshirë të njoftoj edhe Lojërat e ardhshme Paralimpike të Londrës. Punët përgatitore të çdo qyteti organizativ janë të ndryshme. Në përgjithësi, punët përgatitore dhe organizative të çdo edicioni kanë progres të madh. "

Bool-i tha se rrezet e ndritura të diellit, bulevardet e gjera dhe ngrohtësia e qytetarëve të Pekinit i kanë lënë atij përshtypje të thellë.

"Studio e Zërit 1+1" është një ekip mediatik i përbërë nga njerëz me probleme shikimi. Zoti Qing Fen nga ky ekip është bërë tani gazetari i parë i verbër i regjistruar në qendrën kryesore informative. Gjatë Lojërave Paralimpike, ata do të njoftojnë me zërin e tyre këto Lojëra për miqtë me probleme shikimi. Si një nga gazetarët e rrallë me probleme në të parë, Qing Feng është ftuar në provat e Qendrës Informative të Lojërave Paralimpike. Megjithëse nuk mund të shohë me sy, ai tha se "është shumë i qartë" për Qendrën Kryesore Informative. Duke folur për këto prova, Qing Feng u shpreh me kënaqësi:

"Të gjitha gjërat i përdora një herë, duke përfshirë edhe hotelin. Ata kishin shumë dëshirë të dëgjonin mendimet tona dhe na pyesnin me çdo mënyrë për vërejtjet tona. Ata kanë punuar shumë mirë për të gjitha hollësirat, duke përfshirë tryezat e ulëta. Edhe makinat për tërheqjen e parave ata i bënë me butona të mëdha, që janë të lehta për të gjetur. Të gjitha këto hollësi as ne nuk i kishim menduar ".

Edwin Diala Akalonu është një gazetar sportiv i gazetës nigeriane "Vanguard Sportsnow". Megjithëse është njeri me aftësi të kufizuar fizike, tani është hera e tretë që ai njofton për Lojërat Paralimpike. Si një gazetar sportiv nigerian me shumë vjet përvojë, ai foli me krenari për bashkatdhetarin e tij, ish- qendrën e NBA-së Hakeem Olajuwon. Olajuwon dhe basketbollisti kinez Yao Ming, të dy janë qendra kryesore të NBA-së, prandaj kjo është bërë temë e bisedimeve të Akalonut me gazetarë. Duke i krahasuar të dy, Akalonu e adhuron më shumë Yao Ming-in, por jo për arsye të mjeshtërisë në basketboll, por se Yao Ming merr pjesë aktivisht në aktivitete publike në interes të njerëzve me aftësi të kufizuara fizike. Ai tha:

"Olajuwon nuk është kthyer akoma në Nigeri dhe të bëjë disa aktivitete siç ka bërë Yao Ming në Kinë, si p. sh. përhapja e basketbollit në atdheun e tij dhe pjesëmarrja në disa aktivitete të tjera shoqërore për të përhapur çështjet publike në interes të shoqërisë. Ne nuk e kemi parë Olajuwon-in të ketë bërë të njëjtën punë. Vitin e kaluar shkova në Shangai, në çdo rrugë kishte reklama basketbolli, edhe në ekranet e mëdha të bulevardeve transmetoheshin pamjet e Yao Ming si basketbollist. Si nga ana e aktiviteteve publike në interes të shoqërisë dhe ndihma për njerëzit me aftësi të kufizuara fizike, Olajuwon nuk ka bërë kaq shumë se Yao Ming".

Megjithëse është njeri me aftësi të kufizuara fizike, kjo nuk ka ndikuar në entuziazmin dhe besimin e Akalonut për njoftimin e Lojërave Paralimpike. Nga ana fizike, duket sikur ai nuk ka kushte të përshtatshme për t'u bërë gazetar, por duke folur për epërsinë e tij, Akalonu na tregon me buzëqeshje shkopin e vet dhe thotë me krenari:

"Ky është epërsia ime. Unë kam disa vjet që punoj si gazetar. Jam shumë profesionist, për arsye se unë nuk kam nevojë për orientimin e të tjerëve, vetë unë e di çfarë më duhen. Përvoja është gjysma e epërsisë sime. Kur në jetën tuaj zbuloni talentin e posaçëm profesional, ju do të jeni në radhët e më të mirëve." ( Zhai) (Artan)