"Është e rrallë që organizohet gara e hipizmit në Hong-Kong, për më tepër, në të do të marrë pjesë një sportist vendës, ky është një nder për ne. Sapo ishte bashkë me mua, më duket se ai ka bërë përpjekje të mëdha, si kryetar i komitetit olimpik nuk dua të ushtroj presion mbi të. Ëndrra jonë është që nëpërmjet përpjekjeve të tij, flamuri i Rajonit të Posaçëm Administrativ të Hong-Kongut të ngrihet në hipodrom."

39-vjeçari Ye Shaokang u paralizua nga temperatura e lartë kur ishte 1 vjeç. Në vitin 1991 ai u diplomua në Universitetin e Gjuhës Kineze të Hong-Kongut, më vonë mori edhe titullin master për metrologji e statistikë, si dhe MBA. Ai ka në dorë 3 kompani. Por tani ai është më i njohur si mbajtës i pishtarit olimpik dhe pjesëmarrës në garën paralimpike të hipizmit 2008.

Ye Shaokang duket shumë i ri në pamje dhe është gjithmonë i buzëqeshur. Ye Shaokang i veshur me kostum kalorësi e hipur në kalë duket shumë energjik, nga vështrimi i tij i butë dhe fytyra e buzëqeshur nuk mund të shohësh lodhjet e vështirësitë që ka kapërcyer ai gjatë rritjes nga një njeri me aftësi të kufizuar fizike në kalorës. Edhe në bisedë me gazetarët ai shpreh shpesh ndjenjat e tij me fjalën "gëzim".

"Unë jam shumë i gëzuar që garat olimpike të hipizmit organizohen në Hong-Kong, që jam sportist dhe mbajtës i pishtarit. Kjo është një gjë shumë e rrallë në jetën time, jam shumë i gëzuar."

Ye Shaokang filloi ta njohë me të vërtetë hipizmin në vitin 2001, kur ishte mbi 30 vjeç. Ai tha se nganjëherë fati është i drejtë, kur i mori këmbët, i dha aftësinë për të vrapuar hipur në kalë. Gjatë 6 vjetëve që merret me stërvitje hipizmi, ai ka fituar shumë medalje në garat e hipizmit në Australi, Japoni, Kanada, Angli etj. Në vitin 2005 në kampionatin e hipizmit të njerëzve me aftësi të kufizuar fizike Ye Shaokang fitoi titullin e kampionit të përgjithshëm të grupit B, ndërsa në vitin 2006, në garën e hipizmit panaziatike e të Paqësorit në Kanada ai u kualifikua i pari me 61 pikë për në garën paralimpike të hipizmit 2008 si përfaqësues i Hong-Kongut.

Përballë garës në vendlindjen e vet, Ye Shaokang ndien pak a shumë presion.

"Presioni ka dy anë, ka edhe anën e tij të mirë, si p. sh. shumë njerëz do të më përkrahin, si anëtarët e familjes, kolegët, miqtë, adhuruesit e mi etj. Prandaj përgatitja psikologjike e sportistëve është gjithashtu shumë e rëndësishme."

Tani Ye Shaokang po përgatitet për Paralimpiadën, pjesëmarrja në të është puna e tij më e madhe. Të paktën 5 ditë në javë ai bën stërvitje në hipodrom dhe merret me studim teorik, në të njëjtën kohë ai po forcon shkathtësinë dhe koordinimin e trupit nëpërmjet notit, gjimnastikës kineze taiji etj.

"Bëj stërvitje 5 ditë në javë. Kam bërë edhe 3 muaj stërvitje në Angli për të ngritur teknikën time."

Në garat olimpike të hipizmit përfshihen dresazhi, gara në fushë me pengesa dhe tregarëshi me kërcim, ndërsa në paralimpiadë përfshihet vetëm dresazhi, kështu që Ye Shaokang do të marrë pjesë si përfaqësues i Hong-Kongut në garën e dresazhit.

Dresazhi ka për qëllim të provohet bindja e shkathtësia e kalit dhe koordinimi i kalorësit. Kalorësi dhe kali në bashkëpunim kryejnë një sërë lëvizjesh të bukura e elegante, prandaj dresazhi quhet edhe "baleti i hipizmit". Ye Shaokang tha se nga dresazhi shikuesit mund të admirojnë unifikimin e koordinimin e bukur dhe harmonik të njeriut me kalin.

"Gara e dresazhit kërkon koordinimin e kalorësit me kalin, kali dhe kalorësi i bëjnë së bashku lëvizjet e ndryshme, nga të cilat mund të shohësh harmoninë dhe tablonë unanime."

Siç bëri të ditur uebsajti zyrtar olimpik i Hong-Kongut, në garën paralimpike të dresazhit të hipizmit 2008 do të marrin pjesë 78 sportistë nga vende e rajone të ndryshme të botës. Si i vetmi kalorës hongkongas që do të marrë pjesë në këtë garë, Ye Shaokang u shpreh se ai ka besim të plotë në fitore, por njëkohësisht ai mban një qëndrim të zakonshëm ndaj garës, sepse motoja "Pjesëmarrja është kryesorja" i afrohet më shumë thelbit të olimpiadës.

"Gjatë garës më kryesorja është të tregosh nivelin tënd më të mirë. Unë shpresoj se gjatë kohës para fillimit të Paralimpiadës do të kem përparim çdo ditë e çdo muaj." (Pina)