Ping Yali është një e verbër, është edhe nëna e një fëmije me aftësi të kufizuar fizike, është një punëtore e dalë nga puna dhe e vetëpunësuar, e është njëkohësisht një mjeshtre masazhi që ka hapur blog në internet? Të dashur dëgjues, ndoshta ajo ju duket vetëm një njeri me aftësi të kufizuar fizike, por ju tregoj se ajo është kinezja që ka fituar medaljen e parë të artë në paralimpiadë. Më poshtë ju ftoj të ndiqni reportazhin me titull: "Bota e ndritur e Ping Yali-së".

Dimri i ftohtë me kohë të vrenjtur i solli së verbrës Ping Yali shumë telashe. Por një mëngjes, nën drejtimin e qenit Lucky, ajo shkoi për punë në Qendrën e saj të Masazhit.

"Mirëmëngjes, drejtoresha Ping!"

Në Qendrën e Masazhit të së verbrës Ping Yali, që ndodhet në një lagje banimi në Hajdian të Pekinit, punonjësja Zhang, pasi e përshëndeti Pingun, vazhdoi punën e vet. Ajo i tha korrespondentit se tani Ping Yali zotëron tri qendra të tilla masazhi, e në kohën e ngarkuar me punë, drejtoresha punon edhe vetë me klientët.

Qendra e masazhit është shumë e pastër, në mur është vendosur një fotografi, ku Ping Yali ka dalë e buzëqeshur së bashku me kryetarin e Federatës së Njerëzve me Aftësi të Kufizuar Fizike të Kinës Deng Pufang.

Ping Yali, që vuante që në fëmijëri nga katarakti serioz, i tha korrespondentit:

"Në vogëli, nëna ime mendonte që vetëm mjafton të rroj unë."

Por sporti i ka hapur Ping Yali-së botën e ndritur.

Në shkollën fillore, kur ajo dëfrente me shokët e shoqet e klasës duke vrapuar me shpejtësi, atë e zbuloi trajneri i zgjedhjes së sportistëve me paaftësi pune. Kështu ajo, që ishte mirë me shëndet, filloi të stërvitej për kërcimin së gjati. Në vitet e para asaj i mungonte terreni stërvitor dhe bënte stërvitje vetëm në kohën e pushimit të sportistëve normalë.

Pas kapërcimit të shumë vështirësive, ajo pati çastin më të ndritur në jetën e saj. Në qershor të vitit 1984, në Paralimpiadën e Los Anxhelosit, ajo fitoi medaljen e artë në kërcimin së gjati, duke thyer "rekordin zero" të Kinës në paralimpiadë.

Në atë moment Ping Yali-së iu kujtua nëna e saj, e cila i vdiq nga kanceri kur ajo ishte vetëm 8 vjeçe. Ajo i tha korrespondentit se deri në kohën e vdekjes, e ëma kishte merak të madh për të: Si do të jetonte një vajzë e verbër pa përkujdesjen e nënës? Ping Yali dëshironte që këtë medalje të artë t'ia kushtonte pikërisht nënës së saj të dashur.

"Kur mora këtë medalje të artë, më zuri shumë malli për nënën time."

Në vitin 1988, me qëllim që t'i përkushtohej përkujdesjes për të birin, Ping Yali i dha fund jetës së saj sportive 9-vjeçare. Gjatë këtyre 9 vjetëve ajo fitoi mbi 10 medalje. Pikërisht në atë vit fabrika ku punonte ajo, nuk pati efektivitet të mirë në punë, kjo kampione paralimpike u bë punëtore e dalë nga puna. Atëherë ajo nuk kishte para dhe mendonte ta shiste edhe medaljen e saj të artë paralimpike, që e ka bërë atë të famshme. Ping Yali kujtoi duke thënë:

"Pasi zbrita nga tribuna e dhënies së medaljeve, hasa përsëri vështirësi në jetë. Por mendova se isha ende e re, nuk dëshiroja të jetoja me ndihmën e qeverisë, desha të jetoja ashtu si njerëzit normalë. Prandaj fillova vetëpunësimin."

Vetëpunësimi i ka hapur Ping Yalisë botën e dytë të ndritur.

Duke shfrytëzuar mjeshtërinë e masazhit që ka studiuar në shkollën e të verbërve të Pekinit, Ping Yali hapi një qendër masazhi më 29 qershor të vitit 1999. Me ndihmën e kuadrove dhe banorëve të lagjes, ajo punonte me zell dhe të ardhurat e saj që nga muaji i parë i kaluan të 2 mijë juanët. Gjatë vetëpunësimit ajo ka hasur edhe shumë vështirësi. Ajo tha:

"Vështirësia e parë kryesore ishte mungesa e fondeve dhe e dyta ishte mungesa e terrenit të administrimit."

Gjatë vetëpunësimit të parë, të ardhurat e saj të mëvonshme ishin herë shumë dhe herë pak, nganjëherë bënte edhe gabime, duke u kthyer klientëve 100 juanë në vend të 10 juanëve, por deri në vitin 2002 ajo i shleu të gjitha borxhet.

Lin Jun është një klient i rregullt në Qendrën e Masazhit të Ping Yali-së. Ai i tregoi korrespondentit tonë:

"Prej shumë vjetësh vij këtu për masazh. Kam parë se ish-kampionia paralimpike ka hasur vështirësi në jetë, por ajo është e çeliktë, nuk përkulet para vështirësive, jeton me plot pasion."

Çdo njeri që e njeh Ping Yali-në, vëren se në botën e saj drita ka mposhtur errësirën.

Në vitin 2008 ajo hapi tri qendra të tilla masazhi, ndërsa në kohën e lirë ajo ka krijuar edhe blogun e vet në internet, ku ka dëshirë t'u tregojë më shumë njerëzve historinë e saj e t'u japë edhe më shumë forcë.

Në fund të kësaj interviste ajo shprehu dëshirën që, nëpërmjet Radios së Jashtme të Kinës, t'u thotë sportistëve të mbarë botës:

"Unë desha t'u tregoj të gjithë sportistëve, si atyre normalë, ashtu edhe sportistëve jo normalë, mos harroni kurrë studimin gjatë stërvitjes, duhet të administroni mirë jetën tuaj dhe të mos mendoni se pas zbritjes nga tribuna e medaljeve i vutë pikë jetës suaj të larmishme. Unë shpresoj se të gjithë sportistët, si në vrapimin e stafetës 4 herë 100 metra do të ecin në mënyrë të shkëlqyeshme në çdo segment të jetës së tyre!"( Drita-Daming )