dëgjoni

Të dashur dëgjues, në rubrikën e sotme "Aktualitet nga Kina" do të ndiqni shënimin me titull "Janë zhvilluar aktivitetet e shpëtimit në përpjesëtime të mëdha në zonat e prekura nga tërmeti në provincën Siçuan të Kinës".

Deri në orën 14 të 14 majit numri i të vdekurve në tërmetin në provincën Siçuan të Kinës arriti në 14866. Kina po mobilizon të gjitha burimet dhe forcat për të zhvilluar aktivitetet e mëdha shpëtimtare në zonat e prekura nga tërmeti. Repartet e shpëtimit kanë hyrë në qendrën e tërmetit. Distrikti Wencuan, që ishte në epiqendër të tërmetit, është vetëm mbi 100 kilometra larg nga Chendu-ja, kryeqendër e provincës Siçuan. Por, për shkak se rrëshqitja e dheut të maleve e shkaktuar nga tërmeti ka penguar rrugët për në këtë distrikt, moti është shumë i keq dhe ndodhin shpesh tërmete të vogla, puna shpëtimtare është shumë e vështirë.

Korrespondenti i radios sonë njoftoi nga qyteti Dujianyan afër Wencuanit:

"Nga qyteti Chendu në distriktin Wencuan duhet të kalohet nëpërmjet qytetit Dujianyan. Për shkak të rrëshqitjes së maleve, disa materiale shpëtimi nuk mund të çohen atje. Tani po bie shi dhe moti është i keq. Edhe helikopteri nuk mund të çojë materialet e shpëtimit."

Punonjësit e shpëtimit u detyruan të shkojnë më këmbë nga zonat përreth në distriktin Wencuan. Më 13 maj në mesditë, kontingjenti i parë i ushtarëve hyri në qytezën Yinsiu të distriktit Wencuan për të shpëtuar banorët e rrethuar nga rrënojat. Më vonë, edhe mbi 800 oficerë dhe ushtarë të Forcave të Armatosura arritën në këtë distrikt për të shpëtuar banorët e prekur nga tërmeti.

Nga lajmet e tanishme, del se në këtë distrikt ndërtesat janë prishur rëndë dhe është vërtetuar se 500 banorë kanë vdekur. Kurse në lokalitetin Longxi dhe në qytezën Yinsiu afër Wencuanit gjendja e fatkeqësisë është më e rëndë.

Kryeministri kinez Wen Jiabao kërkoi nga palët e ndryshme të hapin sa më parë rrugët për në Wencuan.

"Ushtria Çlirimtare Popullore ka dërguar ushtarët për të hapur rrugët për të shpëtuar banorët e rrethuar nga rrënojat. Ushtria Çlirimtare Popullore do të dërgojë sa më shumë ushtarë që duhen."

Më 13 maj në mbrëmje, Komanda kundër tërmetit thirri një mbledhje. Kryeministri Wen Jiabao kërkoi nga palët e ndryshme të shpëtojnë shpejt banorët e rrethuar dhe të ulin në maksimum përqindjen e vdekjeve.

Korrespondenti i Agjencisë Kinezë të Lajmeve Sinhua Li Yun, që po njofton nga Zyra e rasteve urgjente e Shtabit të Përgjithshëm të ushtrisë kineze, tha se tani një sasi e madhe e ushtarëve kinezë po shkojnë në zonat e prekura nga tërmeti në provincën Siçuan.

"Sipas të dhënave statistikore, mbi 16 mijë ushtarë arritën në zonat e prekura nga tërmeti dhe mbi 34 mijë ushtarë po shkojnë në këto zona. Ushtria ka dërguar 11 aeroplanë ushtarakë dhe 9 aeroplanë civilë për të transportuar ushtarët."

Përveç ushtarëve që kanë hyrë në zonat e prekura nga tërmeti, Kina ka grumbulluar edhe shumë punonjës shpëtimi nga krahinat e ndryshme për të ndihmuar zonat e prekura nga tërmeti. Drejtori i Drejtorisë së Shpëtimit dhe të Ndihmës në Rast Fatkeqësie pranë Ministrisë së Çështjeve Civile të Kinës Wang Zhenyao tha:

"Puna e tanishme urgjente është shpëtimi i njerëzve. Po të ketë pak shpresë, qeveria do të sigurojë punën shpëtimtare."

Ekipet mjekësore të dërguara nga sektorët shëndetësorë të Kinës po shkojnë nga krahinat e ndryshme në zonat e prekura nga tërmeti të provincës Siçuan. Edhe materialet e ndihmës po çohen nga krahinat e ndryshme në këto zona. Zv.ministri i Çështjeve Civile të Kinës Luo Pinfei tha:

"Financa qendrore ka dërguar në mënyrë urgjente 860 milionë juanë për punën shpëtimtare. Kjo ministri ka dërguar mbi 60 mijë çadra dhe 50 mijë jorganë në zonat e prekura nga tërmeti."

Qarqet e ndryshme të Kinës kanë ndërmarrë njëra pas tjetrës aktivitetet e kontributit. Në të njëjtën kohë, shumë vende dhe organizata ndërkombëtare janë shprehur se do t'u japin qeverisë dhe popullit kinez ndihmë për punën e shpëtimit kundër tërmetit. Një funksionar i Ministrisë së Çështjeve Civile të Kinës u shpreh se Kina mirëpret komunitetin ndërkombëtar t'u japë ndihmë zonave të prekura nga tërmeti në provincën Siçuan dhe do t'i çojë në kohë materialet dhe paratë e pranuara në zonat e prekura nga tërmeti. (Du) (Artan)