Agjencia Hsinhua njoftoi se drejtori i Drejtorisë së Shpëtimit nga Fatkeqësia dhe të Ndihmës pranë Ministrisë së Punëve Civile të Kinës Wang Zhenyao u shpreh se deri në orën 16 të 13 majit, numri i të vdekurve në tërmetin e Sichuanit u shtua në mbi 12000 veta.

Më 12 maj, në orën 14 e 28 minuta, ra një tërmet 7.8 ballësh në distriktin Wenchuan të provincës Sichuan. Këshilli i Shtetit i Kinës formoi Komandën kundër tërmetit, e kryesuar nga kryeministri kinez Wen Jiabao. Tani, kryeministri Wen Jiabao po qëndron në zonën e prekur nga tërmeti për të drejtuar punën e shpëtimit kundër tërmetit.

Më 13 maj paradite, kryeministri i Kinës Wen Jiabao u shpreh se tërmeti i 12 majit në distriktin Wenchuan të provincës Sichuan është një fatkeqësi natyrore jashtëzakonisht e madhe dhe qeveria kineze do të bëjë të gjitha përpjekjet në përkrahje ndaj zonave të prekura nga fatkeqësia.

Më 13 maj Ministria e Financave e Kinës shpalli se financat qendrore kanë investuar në mënyrë urgjente 860 milionë juanë në ndihmë të zonave të prekura nga tërmeti në zhvillimin e shpëtimit.

Tani forcat e ndryshme ndihmëse po shkojnë pandërprerë drejt zonave të prekura në provincën Sichuan. Mirëpo si pasojë e ndërprerjes së komunikacionit dhe të ndërlidhjes si dhe të motit të keq me shi, punët shpëtuese kanë hasur vështirësi shumë të madhe.

Deri më 13 maj në orën 6 e 30 minuta, Ushtria Çlirimtare Popullore e Kinës dhe repartet e policisë së armasotur kanë dërguar afro 17 mijë ushtarakë për punët shpëtuese. Deri më 13 maj në orën 7, repartet e Policisë së Armatosur Kineze shpëtuan mbi 1800 të plagosur nga tërmeti.

Tani centralet elektrike në zonat e prekura nga tërmeti janë në përgjithësi të qëndrueshme. Linjat kryesore hekurudhore të prekura rifilluan funksionim.

Tani nuk ka njoftim për vdekjen a plagosjen e të huajve në këtë tërmet. (Wang Lei)