Më 7 maj, kryetari i shtetit i Kinës Hu Jintao, që ndodhet për vizitë në Japoni, dhe kryeministri japonez Fukuda Yasuo nënshkruan në Tokio deklaratën e përbashkët mbi nxitjen në mënyrë të gjithanshme të marrëdhënieve strategjike të leverdisë reciproke ndërmjet Kinës dhe Japonisë. Ky është dokumenti i 4-t politik ndërmjet të dy vendeve.

Në këtë dokument thuhet se të dyja palët janë të mendimit se për të dy vendet, marrëdhëniet kino-japoneze janë një nga marrëdhëniet më të rëndësishme dypalëshe e bashkëpunimi miqësor, paqësor e afatgjatë është zgjedhja e vetme e të dy palëve. Ato vendosën që të nxitin në mënyrë të gjithanshme marrëdhëniet strategjike të leverdisë reciproke ndërmjet Kinës dhe Japonisë, duke arritur bashkekzistencën paqësore, miqësinë brez pas brezi, bashkëpunimin me leverdi reciproke dhe zhvillimin e përbashkët ndërmjet të dyja vendeve.

Të dyja palët ritheksuan se do të zbatojnë vazhdimisht "Deklaratën e përbashkët kino-japoneze", "Manifestin e përbashkët kino-japonez" dhe "Traktatin e paqes e të miqësisë kino-japonez". Të dyja palët konfirmuan se Kina e Japonia janë partnere të bashkëpunimit reciprok dhe nuk janë kërcënime reciproke. Ato ritheksuan se do të mbështetin reciprokisht zhvillimin paqësor të palës tjetër dhe do t'i zgjidhin problemet mes të dyja vendeve nëpërmjet bisedimeve dhe koordinimeve.

Pala japoneze ritheksoi se në problemin e Tajvanit do të vazhdojë të mbajë qëndrimin e saj të shprehur në "Deklaratën e përbashkët kino-japoneze". Më 7 maj, Hu Jintao u takua në Tokio përkatësisht me liderët e Partisë Liberal-Demokratike, Partisë "Komeito e Re", Partisë Demokratike dhe Partisë Komuniste Japoneze.

Hu Jintao vuri në dukje se deklarata e përbashkët mbi nxitjen në mënyrë të gjithanshme të marrëdhënieve strategjike të leverdisë reciproke ndërmjet Kinës dhe Japonisë do të luajë rol të rëndësishëm drejtues për zhvillimin e ardhshëm të marrëdhënieve kino-japoneze. (Yuan Xin)