dëgjoni

Më 5 shkurt u mbyll në Pekin Gara e Notit e Kinës e serisë së veprimtarive "Paç fat, Pekin!", që zgjati 6 ditë. Kjo garë është jo vetëm veprimtaria e parë sportive e organizuar në Qendrën Kombëtare të Notit "Kubi i ujit", që gjendet në zonën qendrore olimpike të Pekinit, por edhe një garë e rëndësishme eksperimentale, që imitoi orarin e vërtetë të garave të notit të Lojërave Olimpike. Pas kësaj gare eksperimentale, instalimet e "Kubit të ujit" si dhe aftësia e tij e funksionimit u vlerësuan lart nga palët e ndryshme. Do të dëgjoni tani një reportazh të hollësishëm lidhur me këtë.

Megjithëse Gara e Notit e Kinës e zhvilluar në "Kubin e ujit" ishte vetëm një garë eksperimentale, ajo tërhoqi mbi 200 notarë nga 29 vende e rajone të botës. Për ta, arsyeja e pjesëmarrjes ishte shumë e thjeshtë, që garat e notit të Lojërave Olimpike do të zhvillohen po në këtë pallat dhe ata kanë nevojë ta njohin që më parë gjendjen e terrenit në "Kubin e ujit".

Në "Kubin e ujit" u shpenzuan 200 milionë dollarë amerikanë dhe është përdorur teknologjia më e përparuar në botë, struktura e cipës. Ky pallat jo vetëm ka pamje të mrekullueshme, por edhe cilësia e funksionimi i instalimeve të brendshme kanë arritur në nivelin e parë botëror, duke fituar edhe admirimin e sportistëve e gazetarëve që morën pjesë në këtë garë. Notarja gjermane Bita Stefen u shpreh se pishina ndihet shumë mirë, korsitë janë të gjera, uji duket pak i thellë, por s'ka problem për të. Notari nga Guineja e Re Papua Rian Pini tha se, megjithëse "Kubi i ujit" është një pallat shumë i madh, falë shumë tabelave treguese që janë të varura në vendin e duhur, "nuk do ta humb rrugën". Punonjësi i kompanisë amerikane NBC David Nill u shpreh:

"Noti është një sport olimpik shumë i preferuar, veçanërisht në SHBA. 'Kubi i ujit' është një pallat shumë madhështor i notit. Kam raportuar 8 edicione të Lojërave Olimpike. Ky është pallati më perfekt që kam parë dhe besoj se sinjalet televizive të transmetuara nga këtu do të emocionojnë shikuesit e televizionit në mbarë botën."

Duke marrë parasysh kërkesat e shikuesve të televizionit në Amerikën Veriore, në garat e notit të Lojërave Olimpike të Pekinit do të zbatohet një orar i veçantë, garat fillestare do të zhvillohen në mbrëmje sipas orës së Pekinit, ndërsa garat finale paradite po sipas orës së Pekinit. Nga këndvështrimi i biologjisë sportive, një orar i tillë patjetër do të ndikojë mbi notarët, që janë mësuar me garat në mbrëmje. Në këtë garë eksperimentale u zbatua i njëjti orar me garat e Lojërave Olimpike të Pekinit, kështu iu krijua pjesëmarrësve një rast për përshtatjen me orarin e ri të garave.

Në finalen e 200 metrave stil i lirë , notari gjerman Paul Biederman u shpall kampion, por rezultati i kësaj here ishte 6 sekonda më shumë se rekordi botëror. Më t'u mbyllur finalja, Biedermani u shpreh:

"Tani është ora 3 e mëngjesit sipas orës gjermane. Një orar i tillë me të vërtetë ndryshon nga garat e kaluara. Rezultati i tanishëm më kënaq shumë dhe besoj se në Lojërat Olimpike do të përshtatem me garat paradite."

Si mbajtëse e rekordit botëror në 100 metra stil i lirë për femra, notarja gjermane Bita Stefeni ishte sportistja më e fortë në këtë garë eksperimentale. Megjithëse ajo u shpall kampione lehtësisht, rezultati i saj kësaj here ishte 2 sekonda më shumë se rekordi botëror. Ajo tha: "Më pëlqen gara në mbrëmje, por orari është përcaktuar dhe unë duhet të përshtatem me të."

Orari i garave olimpike nuk mund të ndryshojë. Shumë notarë me potencial filluan mënyrën e stërvitjes në përshtatje me këtë orar. Që nga viti i kaluar, ekipi kombëtar kinez i notit ka ndryshuar kohën e fillimit të stërvitjes nga ora 9 në orën 6 të mëngjesit. Trajneri i përgjithshëm i ekipit kombëtar kinez të notit, z. Zhang Yadong, u shpreh: "Zhvillimi i finaleve olimpike në mbrëmje do t'u krijojë epërsi notarëve evropiane, dhe veçanërisht atyre amerikanë."

Gjatë kësaj gare eksperimentale, pjesa dërrmuese e notarëve ishin të mendimit se "Kubi i ujit" u dha kushte të mira dhe ndryshimi në orarin e garave të notit nuk do të ndikojë shumë negativisht mbi rezultatin e tyre në Lojërat Olimpike të Pekinit. (Wang Lei) (Artan)