dëgjoni

Kryetari i shtetit i Kinës Hu Jintao u largua më 6 qershor nga Pekini për në Gjermani, për të marrë pjesë në dialogun midis tetë vendeve të zhvilluara dhe liderëve të 5 vendeve në zhvillim. Ai do të bëjë gjithashtu një vizitë në Suedi. Funksionarët e Ministrisë së Punëve të Jashtme të Kinës u shprehën se turneu i kësaj here i kryetarit Hu ka rëndësi të madhe për nxitjen e dialogut jug-veri, forcimin e bashkimit të vendeve në zhvillim dhe thellimin e bashkëpunimit miqësor me Suedinë. Tani do t'ju njohim me më shumë hollësira të kësaj vizite.

Grupi i tetë vendeve përbëhet nga SHBA-ja, Britania e Madhe, Franca, Gjermania, Italia, Kanadaja, Japonia dhe Rusia. Ajo është një organizatë me pjesëmarrjen e këtyre vendeve të zhvilluara. Por, me rrijtjen e ndikimit të vendeve të tjera në zhvillim si Kina dhe India etj., nga viti 2004, gjatë organizimit të samitit të grupit të tetë vendeve, pala organizative filloi të ftojë liderët e vendeve kryesore në zhvillim të marrin pjesë në të. Lidhur me temën e këtij samiti, ndihmësi i ministrit të Punëve të Jashtme të Kinës Cui Tiankai tha:

"Në mbledhjen e këtij viti, do të diskutohen kryesisht ekonomia botërore, investimet dhe përgjegjësia shoqërore, krijimtaria dhe mbrojtja e të drejtave të pronësisë intelektuale, ndryshimi e klimës etj. Të gjitha pikat e nxehta kanë të bëjnë me problemet më të rëndësishme dhe më urgjente për zhvillimin e qëndrueshëm dhe të vazhdueshëm të ekonomisë botërore, të cilat kanë nevojë për bashkëpunimin midis vendeve të zhvilluara dhe atyre në zhvillim."

Përveç Kinës, India, Brazili, Afrika e Jugut dhe Meksika janë ftuar për të marrë pjesë në mbledhje. Gjithashtu, disa vende afrikane dhe organizatat si OKB-ja, Banka Botërore dhe FMN-ja etj., do të jenë të pranishme në të.

Tani, edhe problemi i ndryshimit të klimës globale ka tërhequr vëmendjen e madhe të komunitetit ndërkombëtar. Prandaj, ky problem është një temë e pashmangshme e samitit. Megjithëse tani ekzistojnë pikëpamje të ndryshme mbi arsyen, përgjegjësinë e mënyrat e zgjidhjes së problemit të ngrohjes së klimës, opinioni i përgjithshëm ka arritur katër mendime të përbashkëta.

Lidhur me këtë, kryetari i Komisionit për Zhvillimin dhe Reformën Kombëtare Ma Kai shpjegoi se: "Së pari është që klima botërore po ngrohet; së dyti është që ky fakt ka shkaktuar pasoja të rënda për mjedisin natyror dhe atë të jetesës e të zhvillimit të njerëzimit; së treti, përveç ndikimit të faktorëve natyrorë, ngrohja e klimës është e lidhur ngushtë me veprimtarinë e njeriut; të katërti, ky problem është bërë një sfidë që ndodhet përballë të gjithë popujve dhe duhet përpjekje të përbashkëta."

Qeveria kineze i kushton rëndësi me konsekuencë problemit të ndryshimit të klimës dhe nëpërmjet një sërë masash të rëndësishme, ajo dëshiron të punojë së bashku me komunitetin ndërkombëtar për të frenuar prirjen e ngrohjes së atmosferës. Ndihmësi i ministrit të Jashtëm Cui Tiankai tha: "Populli kinez zë një të pestën e popullsisë së mbarë botës. Prandaj, qeveria kineze i kushton vëmendje të madhe këtij problemi. Ne e trajtojmë këtë çështje me përgjegjësinë që mbajmë për interesat e popullit kinez dhe tërë njerëzimit. Ne mendojmë se 'përgjegjësia e përbashkët, por e ndryshme' duhet të jetë baza e zhvillimit të bashkëpunimit ndërkombëtar në këtë fushë. Këto kohë, kryetari Hu Jintao do të shtjellojë qëndrimin e propozimet e palës kineze gjatë organizimit të samitit të grupit të tetë vendeve të zhvilluara me 5 vendet kryesore në zhvillim."

Siç mësohet, pas pjesëmarrjes në këtë samit, kryetari Hu do të bëjë një vizitë në Suedi. Ai do të zhvillojë bisedime me liderët e këtij vendi për të hartuar planin dhe për të përcaktuar drejtimin e zhvillimit të marrëdhënieve dypalëshe. (Çan Yean)