dëgjoni

Më 12 prill, kryeministri kinez Wen Jiabao që ndodhet për vizitë në Japoni mbajti në Kongresin e Japonisë fjalimin me titull "Miqësia e bashkëpunimi" para mbi 400 anëtarëve të Senatit dhe të Dhomës së Përfaqësuesve të Japonisë. Kjo është hera e parë që një udhëheqës kinez mban fjalim në Kongresin e Japonisë gjatë 22 vjetëve.

Edhe kryeministri i Japonisë Shinzo Abe dhe ministri i Jashtëm Taro Aso ishin të pranishëm e dëgjuan fjalimin e Wen Jiabaos. Wen Jiabao tha se gjatë shkëmbimeve mbi 2000 vjeçare, kombi kinez e kombi japonez kanë mësuar nga njëri-tjetri duke nxitur zhvillimin e progresin. Të dyja vendet duhet të trashëgojnë zakonet historike dhe pasuritë e përbashkëta të qytetërimeve.

Wen Jiabao vuri në dukje se për miqësinë e bashkëpunimin, Kina e Japonia nuk duhet të harrojnë mësimet nga historia. Lufta agresive e nisur nga Japonia kundër Kinës u solli popujve të të dy vendeve hidhërime e humbje të mëdha:

"Nxjerrja e mësimeve nga historia është për të ardhmen më të bukur. Pas normalizimit të marrëdhënieve diplomatike kino-japoneze, qeveria e udhëheqës japonezë kanë dënuar shumë herë luftën agresive duke u kërkuar ndjesë vendeve që pësuan agresionin. Qeveria e populli kinez e vlerësojnë lart këtë. Realizimi i miqësisë së përhershme përputhet me rrymën historike dhe dëshirat e të dy popujve."

Wen Jiabao u shpreh se në gjendjen e re historike, midis Kinës dhe Japonisë ekzistojnë shumë interesa të përbashkëta. Ai paraqiti 5 parime për realizimin e bashkekzistencës paqësore, të miqësisë së përhershme, të bashkëpunimit me leverdi reciproke dhe të zhvillimit të përbashkët. Ai tha:

"3 dokumentet politike si 'Deklarata e përbashkët kino-japoneze' etj. janë baza e marrëdhënieve dypalëshe. Vetëm nëse të dyja palët zbatojnë rreptësisht parimet e këtyre 3 dokumenteve, marrëdhëniet dypalëshe do të zhvillohen normalisht."

Duke folur për problemin e Tajvanit, Wen Jiabao tha se problemi i Tajvanit lidhet me interesat themelore kombëtare të Kinës. Kina do të bëjë përpjekje më të mëdha për ta zgjidhur këtë problem në mënyrë paqësore, por nuk do të pranojë pavarësinë e Tajvanit. Kina shpreson se Japonia do të zbatojë premtimet dhe do ta trajtojë siç duhet këtë problem.

Kryetari i Dhomës së Përfaqësuesve të Japonisë Kono Youhei dhe kryetarja e Senatit Ogi Çikage mbajtën me radhë fjalime. Kono Youhei tha:

"Pas zbatimit të reformës dhe të hapjes me botën e jashtme, zhvillimi i Kinës është shumë i shpejtë, marrëdhëniet ekonomiko-tregtare midis Japonisë e Kinës janë bërë më të ngushta. Zhvillimi i shpejtë i Kinës i ka sjellë Japonisë dobi."

Ogi Çikage theksoi se vizita e Wen Jiabaos në Japoni ka rëndësi të madhe për nxitjen e zhvillimit të mëtejshëm të bashkëpunimit miqësor midis dy vendeve:

"Japonia dhe Kina duhet të zhvillojnë më tej marrëdhëniet strategjike me leverdi reciproke duke shtuar dialogun midis nesh për të dhënë kontribut për paqen e lulëzimin e Azisë dhe të botës." (Fani)