Më 11 prill paradite, kryeministri i Kinës Wen Jiabao mbajti një fjalim në kryeqytetin e Koresë së Jugut Seul mbi marrëdhëniet ekonomiko-tregtare midis të dyja vendeve. Në fjalimin e tij, kryeministri paraqiti propozimin katërpikësh për forcimin e mëtejshëm të bashkëpunimit dypalësh në fushën ekonomiko-tregtare. Tani, ju ftoj të lexoni më shumë lidhur me vizitën e Wen Jiabaos në Korenë e Jugut.

Sivjet është 15 vjetori i vendosjes së marrëdhënieve diplomatike midis Kinës dhe Koresë së Jugut, si dhe viti i shkëmbimeve ndërmjet të dy vendeve. Gjatë këtyre 15 vjetëve, marrëdhëniet miqësore dypalëshe kanë pasur një zhvillim të gjithanshëm, dhe shtimi i bashkëpunimit ekonomiko-tregtar u ka sjellë të dy popujve përfitime reale. Sipas të dhënave statistikore, në vitin 2006, vëllimi i përgjithshëm tregtar kino-jugkorean arriti në 134 miliardë e 300 milionë dollarë amerikanë, shifër kjo 25 herë më e lartë sesa ajo në fillim të vendosjes së marrëdhënieve dypalëshe. Në rrymën e globalizimit, thellimi i mëtejshëm i këtij bashkëpunimi është bërë dëshira e përbashkët e të dyja vendeve dhe të popujve.

Në fjalimin e tij të mbajtur në Seul, kryeministri Wen Jiabao shprehu dëshirën e tij për nxitjen e këtyre marrëdhënieve nëpërmjet përpjekjeve të përbashkëta dypalëshe.

"Bashkëpunimi ekonomiko-tregtar është një pjesë e rëndësishme përbërëse e marrëdhënieve kino-jugkoreane. Ky bashkëpunim ka kushte të favorshme dhe mundësi të mëdha. Ne duhet të zgjerojmë përmasën dhe fushat e bashkëpunimit, duke ngritur nivelin e punës në këtë drejtim."

Wen Jiabao vuri në dukje se të dyja palët duhet të rritin përmasat e tregtisë, duke nxitur investimet reciproke dhe duke shtuar bashkëpunimin në fushën tekniko-shkencore. Lidhur me zgjerimin e vëllimit tregtar midis dy vendeve, Wen Jiabao tha:

"Kina dëshiron të hapë më tej tregun e saj ndaj Koresë së Jugut, duke shtuar importin nga pala jugkoreane. Ne dëshirojmë gjithashtu që Koreja e Jugut të pakësojë pengesat ndaj importit për të krijuar kushte të mira për hyrjen e produkteve kineze në tregun e saj."

Wen Jiabao u shpreh se Kina dëshiron që ndërmarrjet jugkoreane t'i kalojnë investimet nga industria e zakonshme e prodhimit në bujqësi, teknologji të lartë e të re, sektorin e shërbimeve etj. Ai vuri në dukje gjithashtu se Kina dëshiron të mësojë nga përvoja e palës jugkoreane, duke zhvilluar shkëmbimet teknologjike për të forcuar bashkëpunimin në mbrojtjen e mjedisit, në kursimin e energjisë etj.

Në fjalim, kryeministri Wen ritheksoi gjithashtu qëndrimin e Kinës për ndjekjen me vendosmëri të rrugës së zhvillimit paqësor. Ai tha se një Kinë më e lulëzuar dhe më e zhvilluar do të krijojë një shans të madh për vendet e ndryshme të botës, sidomos për vendet fqinje. Një Kinë e tillë mund të japë më shumë kontribut për ruajtjen e paqes botërore dhe rajonale.

Pasi dëgjoi fjalimin e kryeministrit Wen Jiabao, një sipërmarrës jugkorean i tha korrespondentit të radios sonë se

"Unë besoj se marrëdhëniet jugkoreano-kineze do të kenë një zhvillim më të madh. Jam optimist për perspektivën e bashkëpunimit ekonomiko-tregtar dypalësh në të ardhmen."

(Çan Yean)