dëgjoni

Sivjet është 35-vjetori i normalizimit të marrëdhënieve kino-japoneze, si edhe viti i shkëmbimeve kulturore-sportive midis Kinës dhe Japonisë. Nga 11 deri në 13 prill kryeministri i Kinës Wen Jiabao do të bëjë një vizitë në Japoni. Kjo është edhe vizita e parë e një kryeministri të Kinës në Japoni që pas vizitës së fundit 7 vjet më parë. Kjo shënon rifillimin, pas ndërprerjes 5-vjeçare, të shkëmbimeve reciproke të nivelit të lartë midis Kinës dhe Japonisë. Qarqet e ndryshme japoneze u kushtojnë rëndësi të madhe vizitës së kryeministrit të Kinës Wen Jiabao dhe aktiviteteve të "Vitit të shkëmbimeve kulturore-sportive midis dy vendeve". Në aktualitetin e sotëm do të ndiqni hollësira lidhur me këtë.

Kohë më parë, kryeministri kinez Wen Jiabao u shpreh se ai shpreson se vizita e tij në Japoni do të jetë një vizitë që mund të shkrijë akujt. Nënkryetari i komitetit të kuadrove të Partisë Komuniste të Japonisë Ogata Jasuo është i mendimit se vizita e kryeministrit Wen Jiabao ka rëndësi të madhe dhe se ajo do të nxitë më tej zhvillimin e marrëdhënieve midis dy vendeve.

"Mungesa e shkëmbimeve midis liderëve të të dy vendeve është një gjë fatkeqe. Aktualisht kjo gjendje po përmirësohet dhe kjo është shumë e rëndësishme. Vitin e kaluar vizita e kryeministrit të Japonisë Shinzo Abe në Kinë ka rifilluar shkëmbimet midis liderëve të të dy vendeve. Pa dyshim, vizita e kryeministrit Wen Jiabao do të nxitë më tej zhvillimin e marrëdhënieve midis dy vendeve".

Nënkryetari i Klubit të shkëmbimeve kino-japoneze Sugimoto Shizuo është i mendimit se prej një kohe të gjatë Japonia u kushton rëndësi marrëdhënieve me SHBA-në, por nuk u kushton rëndësi atyre me vendet e Azisë. Kjo politikë e jashtme është jonormale. Prandaj ai pret shumë nga vizita e kryeministrit Wen Jiabao në Japoni. Ai shpreson se kryeministri Wen Jiabao do të takohet më shumë me të rinjtë japonezë.

"Kur kryeministri Wen Jiabao të vizitojë Japoninë, unë shpresoj se ai do të takohet më shumë me të rinjtë, për të ngritur shkëmbimet reciproke midis dy vendeve. Unë gjithashtu kam shpresë se edhe liderët e të dy vendeve do të takohen më shpesh".

Oi Naujuki është dëgjues i programit të gjuhës japoneze të Radios sonë. Sa herë që vjen në Kinë, ai dhuron gjak për Kryqin e Kuq të Kinës. Vizita e kryeministrit Wen në Japoni është edhe ajo që ai ka pritur prej një kohe të gjatë.

"Vizita e kryeministrit Wen do t'i bëjë më të ngushta marrëdhëniet midis dy vendeve dhe do të tërheqë vëmendjen e vendeve të ndryshme të botës, sidomos të vendeve të Azisë Lindore". (vera)