Katedra e gjuhës shqipe u hap në Pekin, kryeqytetin e shtetit më të madh të planetit, më 2 prill 1962. Kjo është ditë bardhë për gjuhën shqipe në historinë e saj plot sfida. Falenderoj Zotin që ky mision kulturor m'u besua mua. Kjo më bën të ndjehem mirë dhe t'i jem mirënjohës. Është i gëzueshëm fakti që kjo katedër universitare vazhdon t'i ketë dyert e hapura edhe në ditët tona dhe, në vitin 1969, krijoi edhe një degëz tjetër mjaft aktive, redaksinë e gjuhës shqipe në Radion e Jashtme të Kinës. Në konkurset për dëgjuesit shqiptarë që organizonte kjo redaksi merrja pjesë, ku fitoja edhe ndonjë çmim kulturor, dhe më vjen mirë që populli kinez, në rrugën e ekonomisë së tregut të lirë dhe të pranimit të investimeve të huaja, kryesisht amerikane, po shënon përparime të admirueshme në zhvillimin ekonomik të vendit.

Me rastin e 35-vjetorit të themelimit të kësaj redaksie, u dërgova një mesazh urimi, në të cilin i përgëzoja gjithë shqipfolësit e redaksisë për punën plot pasion dhe fjalën e bukur shqipe në gojën e tyre. Në përgjigje të këtij mesazhi, Hou Yu Pin (Pina), ish studentja ime dhe gazetare e shquar e redaksisë qysh nga dita e krijimit, më shkruante:

"Nga CV-ja mësova se paskeni bërë shumë punë të mëdha dhe keni arritur suksese të mahnitshme në fushën e folklorit, në mësimdhënien e gjuhës shqipe, si dhe në fusha të tjera të studimeve pedagogjike. Ju admiroj shumë për këto rezultate të shkëlqyera dhe ndjehem krenare që ju kam patur profesor... Tani po ju njoh me katedrën e gjuhës shqipe dje dhe sot. Pasi u diplomuam ne, grupi i parë i studentëve që mësuam gjuhën shqipe, për 4 vjet rresht u ndërpre pranimi i studentëve për shkak të "revolucionit kulturor". Në vitin 1970 u pranuan 2 grupe studentësh dhe, qysh nga ai vit e deri sot, çdo 4 vjet pranohen të paktën 15 studentë. Në vitin 2000 u pranuan 24 studentë, shumë prej të cilëve kanë mësuar shkëlqyeshëm. Në korrik të këtij viti, nga studentët që do të diplomohen, 3 vajza dhe 4 djem do të vijnë të punojnë në redaksinë tonë. Kështu grupit tonë do t'i shtohet gjak i ri?"