dëgjoni

Nga 20 deri më 28 prill kryetari i shtetit i Kinës Hu Jintao bëri vizitë shtetërore në Brunei, Indonezi dhe Filipine, si dhe mori pjesë në Samitin azi-afrikan të vitit 2005 dhe në aktivitetet përkujtimore të 50-vjetorit të Konferencës së Bandongut. Gjatë turneut të tij 9-ditor kryetari Hu Jintao mori pjesë në 59 aktivitete, rendi i ditës ishte i ngjeshur, përmbajtja e turneut ishte e pasur dhe rezultatet ishin të frytshme. Në aeroplanin e posaçëm për në atdhe, ministri i jashtëm i Kinës Li Zhaoxing që e shoqëroi Hu Jintaon gjatë vizitës, pranoi intervistën e korrespondentes së Radios së Jashtme të Kinës.

Li Zhaoxing tha se ky turne i Hu Jintaos kishte 4 karakteristika të dukshme:

Së pari, konsolidimi i miqësisë tradicionale dhe shënimi i një faqeje të re të fqinjësisë së mirë.

Kina dhe Brunei, Indonezia dhe Filipinet kanë një histori mbi njëmijëvjeçare të kontakteve midis tyre dhe tani ndodhen para detyrës së përbashkët të zhvillimit. Gjatë vizitës liderët e dy palëve arritën konsensus të lartë në problemin e zhvillimit të marrëdhënieve dypalëshe.

Së dyti, zgjerimi i bashkëpunimit me leverdi reciproke dhe nxitja e zhvillimit të përbashkët.

Gjatë vizitës në tri vendet e lartpërmendura, u nënshkruan afro 30 marrëveshje të bashkëpunimit, që prekin fushat politike, ekonomiko-tregtare, të sigurimit, tekniko-shkencore, kulturore, shëndetësore, të ndihmës në rast fatkeqësish të natyrës, të shkëmbimeve të personelit dhe popullore etj. Ky bashkëpunim miqësor me leverdi reciproke me siguri do të shtojë vitalitet të ri në marrëdhëniet midis Kinës dhe këtyre tre vendeve për të mirat e popujve përkatës dhe për nxitjen e zhvillimit të këtyre vendeve.

Së treti, nxitja e bashkëpunimit rajonal dhe nxitja e paqes dhe e stabilitetit.

Kryetari Hu Jintao theksoi se Kina dëshiron të forcojë bashkëpunimin e fqinjësisë së mirë dhe të miqësisë me vendet e Aseanit, për të realizuar zhvillimin e lulëzimin e përbashkët dhe për të zgjeruar shkëmbimet e koordinimin midis tyre në çështjet ndërkombëtare dhe rajonale. Kina përkrah procesin e integrimit të Aseanit. Liderët e tri vendeve vlerësuan lart rolin konstruktiv të Kinës në këtë rajon dhe dëshirojnë që së bashku me palën kineze të krijojnë një të ardhme më të bukur në këtë rajon.

Së katërti, çuarja përpara e frymës së Bandongut dhe krijimi dorë për dore i një të ardhme të bukur.

Konferenca azi-afrikane para 50 vjetëve ishte një gur monumental i lëvizjes nacional-çlirimtare të Azisë e të Afrikës që ka ushtruar një ndikim të rëndësishëm për zhvillimin e marrëdhënieve ndërkombëtare. Por, pas 50 vjetëve, liderët e 89 vendeve u mblodhën përsëri për synimin e marrëdhënieve azi-afrikane në situatën e re dhe në samit u publikua "Manifesti i marrëdhënieve azi-afrikane i partneritetit strategjik të tipit të ri".

Në Samit Hu Jintao shtjelloi në mënyrë të gjithanshme mendimet e propozimet e Kinës për formimin e marrëdhënieve azi-afrikane të partneritetit strategjik të tipit të ri, që ngjallën jehonë të madhe të përbashkët.

Më në fund Li Zhaoxing tha se turneu i kryetarit Hu Jintao arriti rezultate të dukshme dhe ia arriti edhe qëllimit të thellimit të miqësisë, nxitjes së bashkëpunimit, forcimit të unitetit dhe zhvillimit të përbashkët. ( Daming )