Nga fundi i vitit 2003, kur sapo filloi të hapte faqen elektronike të gjuhës shqipe, redaksia e gjuhës shqipe përgatiste programet tona njëorëshe në gjuhën shqipe, që do të fillonin të transmetoheshin çdo ditë nga marsi i vitit 2004, në valë të mesme 1215 kiloherc në Shqipëri. Ne përgatitëm një program të posaçëm me rastin e hapjes së emisioneve tona në gjuhën shqipe për valë të mesme. Unë, si shefe e redaksisë së gjuhës shqipe, mbajta një fjalim të shkurtër të hapjes, kështu të gjithë anëtarët e redaksisë bënë vetëprezantime dhe njoftime të shkurtra, që dëgjuesit tanë shqiptarë të kenë të qartë strukturën njëorëshe të emisionit tonë në gjunën shqipe dhe përbërjen e redaksisë sonë. Këtë program unë e dëgjova në Shqipëri, në Tiranë më 5 mars, sepse pikërisht në fillim të marsit unë shkova në Tiranë me rastin e vizitës së grupit të Radio-Televizionit të Kinës në Shqipëri, ku bëja pjesë edhe unë.

Ndoshta ju nuk e dini se sa e emocionuar isha unë kur dëgjoja emisionin tonë, që dëgjohej shumë qartë në Tiranë. Kjo ishte me të vërtetë një ngjarje e madhe në historinë e Radios së Jashtme të Kinës dhe të Redaksisë sonë, njëkohësisht edhe një ngjarje e madhe për dëgjuesit shqiptarë. Që nga ajo ditë, dëgjuesit shqiptarë, që kanë ndjekur emisionet tona të valëve të mesme, na kanë dërguar pandërprerë urime të ngrohta. Sidomos, urimet mua mi kanë drejtuar me telefon ose më thoshin direkt dëgjuesit tanë të dashur. Si urimet nga zoti Irfan Mandija, nga zoti Vasil Naçi, nga zoti Gëzim Kasa, nga çifti Gëzim Lika e Liri Lika, nga profesori Emil Lafe, nga zoti Kujtim Pulaj, nga profesoreshat Zana dhe Ana, nga veteranët e luftës nacional-çlirimtare, nga shoferët e taksisë Agron e Gjergji, etj, etj. Ata më uruan: "Urime, Damini, unë të dëgjova shumë qart në radio. Sa bukur flet, sa bukur flasin kolegët tuaj!" "Urime, ju lumtë goja!" "Suksese! Ju uroj të vazhdoni punë mbarë!" " Suksese më të mëdha Radios së Jashtme të Kinës!" dhe shumë urime të tjera. Më gufonte zemra! Deri në atë kohë, s' kishte gjë tjetër, që më kishte gëzuar aq shumë! Për më se 35 vjet që merrem me punën radiofonike të gjuhës shqipe për dëgjuesit shqiptarë, kisha ëndrruar gjithmonë që dëgjuesit tanë të kenë një ditë të dëgjojnë qart emisionet tona. Kjo ëndërr u realizua më në fund! Edhe dëgjuesit shqiptarë janë gëzuar pa masë.

Këtu para mikrofonit, unë, Drita kineze, ju shpreh juve, dëgjuesve tanë të dashur e të nderuar, respektin tim të lartë dhe urimet e mia më të sinqerta me rastin e Vitit të Ri 2005! Ju uroj jetë të lumtur në familje dhe gjithë të mirat!