Kjo ekspozitë u organizua bashkarisht nga Galeria Kombëtare e Arteve e Shqipërisë dhe Muzeu Kombëtar i Arteve i Kinës, si dhe Ambasada e Republikës Popullore të Kinës në Shqipëri.

Në ceremoninë e hapjes së kësaj ekspozite, fjalën e rastit e mbajti drejtori i Galerisë Kombëtare të Arteve të Shqipërisë, zoti Abaz Hado. Ndër të tjerat ai tha:

"Kjo eskpozitë është produkti i shpirtit dhe i talentit të popullit kinez, të një populli të spikatur të një vendi të madh, të Kinës."

Pastaj e përshëndeti hapjen e kësaj ekspozite ambasadori i Republikës Popullore të Kinës në Shqipëri Tian Chang Chun.

Në këtë ekspozitë u ekspozuan rreth 200 punime artistike kineze të kohëve të kaluara, të cilat vizitorët shqiptarë i panë me interes. Ndër to ishin paraqitur shumë punime në letër, të cilat i përkasin një teknike të aplikuar orgjinale, që tradicionalisht është lëvruar dhe vazhdon të kultivohet edhe në ditët e sotme në Kinë. Këto punime i kanë kryer orgjinalisht gratë shtëpiake, sidomos gratë fshatare, kurse tani i bëjnë edhe artistët profesionistë, të cilët vazhdojnë të prodhojnë me orgjinalitet këto lloje punimesh, që për vetë specifikën e tyre, përveç anës artistike, kanë në brendësi edhe anën e tyre historike.

Për fat të mirë, mori pjesë në ceremoninë e hapjes së kësaj ekspozite edhe korrespondetja e Radios së Jashtme të Kinës Damini, që ndodhej me shërbime në Tiranë. Duke shfrytëzuar këtë rast të volitshëm, ajo intervistoi në këtë ekspozitë, disa vizitorë shqiptarë.

Ilda dhe Rovena ishin bashkëstudente të Universitetit Politeknik të Tiranës për inxhinieri ndërtimi, që është një degë e kërkuar në Shqipëri. Ato thanë:

"Më ka pëlqyer shumë, është dicka e veçantë, domethënë nuk kemi parë në ndonjë ekspozitë tjetër, punime të tilla, si ato punime prej letre dhe qëndistaria, shumë gjëra të veçanta. Na ka pëlqyer shumë." "Shumë shumë të bukura."

Për shkak të profesionit të projektimit të ndërtimeve, për të cilin studiojnë, këto studente shqiptare kishin shumë interes të shikonin figurat e vizatimeve.

Në këtë ekspozitë Damini takoi rastësisht edhe me dëgjuesin e Radios sonë të emisioneve në gjuhën shqipe, gazetarin e Televizionit Publik Shqiptar, zotin Marash Mirashi, i cili i tha Daminit me gëzim:

"Sot jam shumë i kënaqur që ndodhem këtu në ekspozitë, pasi me popullin kinez pavarësisht nga distanca e madhe, pavarësisht nga largësia, ne ndjehemi shumë afër, kemi shumë gjëra të përafërta me njeri tjetrin. Kemi anën shpirtërore, kemi kulturën e lashtë. Ne krenohemi që kombin e madh kinez e konsiderojmë vazhdimisht një komb vëlla." Ai tha se ne jemi edukuar me shumë fakte dhe mjaft shqiptarë kudo nëpër Shqipëri, dinë mjaft gjëra për Kinën, si për Murin e Madh Kinez, për luftra të mëdha që ka bërë Kina, për t'ia bërë një shtet solid. Ne dimë që populli kinez jeton në lumturi sot, duke i rrezatuar botës së qytetëruar, kulturë, edukatë, mirësi dhe fisnikëri. Zoti Marashi vazhdoi: "Ekspozita e sotme këtu, e hapur në mjediset e Galerisë Kombëtare të Arteve, këtu në Tiranë, është shembull, tregues i faktit të kulturës së lashtë të popullit kinez. Janë mjeshtrat kinezë, qofshin këto gra apo burra, të cilët përmes aplikacioneve të ndryshme, përmes qëndisjeve në pëlhurë, kanë bërë të mundshme që të sjellin në këtë Galeri botën e tyre shpirtërore, ëndrrën e tyre për një jetë që gëlon, që vazhdon dhe që bëhet vazhdimisht e vazhdimisht të bukur dhe që shërben si një diell për të ndriçuar kudo në çdo pjesë të botës. Pra kultura kineze është e pranishme tashmë jo vetëm në Shqipëri, por në gjithë botën me të gjithë madhështinë e saj. Është një kulturë e admirueshme, është kjo që sot shikohet me interes shumë të madh nga qytetarët e Tiranës, artistët e Tiranës, piktorët e Tiranës, që kanë dëshirë të ndalojnë në çdo stendë, të ndalojnë me shumë dashuri duke parë me shumë vëmendje dhe ishte një kënaqësi shumë e madhe sot këtu, që mjaft artistë, njerëz zyrtarë të Kinës ishin të pranishëm në këtë aktivitet së bashku me vëllezërit shqiptarë."

Pastaj Damini bisedoi edhe me telereporterin dhe xhirruesin e famshëm shqiptar, zotin Naun Laska, që ka xhiruar vizitat e delegacioneve radio-televizive kineze. Ai i tregoi Daminit:

"Ekspozita më pëlqen shumë, janë punime shumë interesante, qëndisma shumë të bukura dhe më pëlqejnë shumë. Janë të këndshme, të bukura, duket tamam arti, i artistëve të popullit kinez, që i kanë punuar."

Nga organizimi i kësaj ekspozite në Tiranë, korrespondentja jonë Damini pa nga afër interesin e madh të publikut shqiptar për artin kinez dhe njëkohësisht ndjeu edhe miqësinë e madhe të popullit shqiptar për popullin kinez. ( Daming )