Më 10 nëntor, kryetari i shtetit i Kinës, Hu Jintiao u nis nga Pekini për vizita shtetërore në Brazil, Argjentinë, Kili dhe Kubë. Ai do të marrë pjesë edhe në mbledhjen e 12-të jozyrtare të liderëve të Apekut, që do të mbahet në Santiago. Ky është turneu i parë i kryetarit Hu Jintiao si lideri më i lartë i Partisë Komuniste të Kinës, i qeverisë dhe i ushtrisë kineze në vendet e Amerikës Latine. Një funksionar i lartë i Ministrisë së Punëve të Jashtme të Kinës tha se ky turne me përmbajtje të pasur dhe me rëndësi shumë të thellë është një veprim i rëndësishëm i Kinës për zhvillimin e diplomacisë në të gjitha fushat.

Brazili, Argjentina, Kili dhe Kuba janë vende me ndikim të madh në rajonin e Amerikës Latine. Në gjendjen e ndërlikuar aktuale ndërkombëtare, Amerika Latine është një forcë e rëndësishme në nxitjen e shumëpolarizimit botëror. Duke folur për rëndësinë e turneut të kryetarit, Hu Jintiao në Amerikën Latine, ministri i jashtëm i Kinës, Li Zhao Xing tha se ky turne ka rëndësi shumë të madhe dhe të thellë për nxitjen e marrëdhënieve të bashkëpunimit miqësor midis Kinës dhe 4 vendeve të sipërpërmendura, si dhe vendeve të tjera të Amerikës Latine, për zgjerimin e ndikimit tonë në Apek, për realizimin e objektivit tonë në ndërtimin e shoqërisë komode dhe për realizimin e ribashkimit të Kinës. Prandaj synon interesin e madh të komunitetit ndërkombëtar.

Brazili është vendi i parë dhe i madh në Amerikën Latine dhe një vend në zhvillim, që ka vendosur marrëdhëniet e partneritetit strategjik me Kinën. Tani, marrëdhëniet kino-braziliane ndodhen në një periudhë të zhvillimit të shpejtë. Vizita e kryetarit Hu në Brazil është një masë e rëndësishme e Kinës, për të thelluar marrëdhëniet kino-braziliane dhe marrëdhëniet tërësore me vendet në zhvillim.

Argjentina dhe Kili janë partnerë të rëndësishëm të bashkëpunimit të Kinës në këtë rajon. Qeveritë e të dyja vendeve i kushtojnë rëndësi të madhe zhvillimit të marrëdhënieve me Kinën. Thellimi i marrëdhënieve midis Kinës e Argjentinës dhe Kinës e Kilit, si dhe nxitja e bashkëpunimit ekonomiko-tregtar dypalësh përputhen me interesat ekonomike dypalëshe dhe me kërkesat e zhvillimit.

Kuba është vendi i Amerikës Latine, që i ka vendosur më herët marrëdhëniet diplomatike me Kinën. Qysh nga vendosja në vitin 1960 e marrëdhënieve diplomatike midis dy vendeve, Kina dhe Kuba kanë zhvilluar bashkëpunim shumë të mirë në fushat politike, ekonomiko-tregtare, tekniko-shkencore dhe kulturore. Të dyja palët përkrahin njëra-tjetrën në problemet e rëndësishme që prekin sovranitetin dhe tërësinë territoriale të njëra-tjetrës. Bashkëpunimi midis dy vendeve në OKB dhe në Organizma ndërkombëtare është i ngushtë. Duke nxitur më tej marrëdhëniet tradicionale e miqësore midis dy vendeve, vizita e kryetarit Hu Jintiao në Kubë edhe do të zgjerojë bashkëpunimin ekonomiko-tregtar me leverdi reciproke midis dy palëve.

Një përmbajtje e rëndësishme e turneut të kryetarit Hu Jintiao në Amerikën Latine është pjesëmarrja në mbledhjen e 12-të jozyrtare të liderëve të Apekut. Duke folur për këtë, ndihmësi i ministrit të jashtëm kinez Shen Guofang tha se kryetari Hu Jintiao do të marrë pjesë në diskutimet e ndryshme dhe do të mbajë një fjalim të rëndësishëm, si dhe do të shtjellojë vija të trasha mendimet e Kinës për gjendjen aktuale ndërkombëtare dhe rajonale, qëndrimin për bashkëpunimin botëror e rajonal dhe propozimet për zhvillimin e ardhshëm të Apekut. (Sihai)