Qysh në ditën e parë më 5 korrik (2004) pasi mbërriti në Pekin, kryetari i Komitetit të Përhershëm të Asamblesë Kombëtare Popullore të Kinës U Bang Guo u takua me delegacion shqiptar dhe pati një bisedë shumë të ngrohtë me të. Midis të dyja palëve u shkëmbyen mendime lidhur me marrëdhëniet dypalëshe dhe me probleme të tjera të interesit të përbashkët.

Gjatë qëndrimit të tij delegacioni bëri vizita jo vetëm në Pekin, por edhe në qytetet Dalian dhe Shangai.

Para se të largohej nga qyteti i Shangait për në atdhe, me kërkesën e përkthyeses së delegacionit, korrespondentes së Radios sonë Hë Da Ming ( Drita), kryetari i Kuvendit të Shqipërisë Servet Pëllumbi i dha asaj një intervistë.

Në fillim z. Servet Pëllumbi tha: "Kjo është vizita e parë e kryetarit të Kuvendit të Shqipërisë në Kinë gjatë këtyre dy vjetëve të fundit, por është edhe hera e parë që e vizitoj Kinën. Delegacioni i Kuvendit të Shqipërisë pati takime të nivelit të lartë me kryetarin e Komitetit të Përhershëm të Asamblesë Kombëtare Popullore të Kinës U Bang Guo, me kryetarët e Komiteteve të Përhershme të Asamblesë Popullore të qytetit të Dalianit dhe të qytetit të Shangait. Po kështu edhe me ministrin e Jashtëm dhe me zv-ministrin e Tregtisë. Në të gjitha këto takime ne morëm mesazhe të qarta miqësie dhe dëshirën e përbashkët të thellimit të mëtejshëm të bashkëpunimit midis dy vendeve tona. Ne patëm edhe raste të shprehim gjithashtu ndjenjat miqësore të popullit shqiptar për popullin kinez, miqësi kjo tradicionale tashmë dhe, në të njëjtën kohë, edhe shprehëm dëshirën që kjo miqësi të vazhdojë e të thellohet më tej edhe në të ardhmen. Po kështu, ne patëm edhe raste të përshëndesim sukseset madhështore që ka arritur populli kinez, në mënyrë të veçantë gjatë këtyre 25 vjetëve të fundit, në zbatimin e politikës së reformave, të iniciatuar nga i nderuari zoti Den Siao Pin dhe, në të njëtën kohë, ne shprehëm dëshirën tonë, që këto suksese të vazhdojnë edhe në të ardhmen."

Në çdo takim dhe çdo rast bisede me kinezët, presidenti i Kuvendit të Shqipërisë z. Servet Pëllumbi, në emër të Kuvendit shqiptar, e përshëndeti kontributin dhe rolin gjithënjë e më të madh të Republikës Popullore të Kinës, të dhënë dhe të luajtur në Këshillin e Sigurimit të OKB-së dhe në organizatat e tjera të ndryshme ndërkombëtare për forcimin e bashkëpunimit ndërkombëtar dhe për mbrojtjen e paqes e stabilitetit rajonal dhe ndërkombëtar. Në këto raste, z. Servet Pëllumbi ka theksuar herë pas here edhe qëndrimin e patundur të qeverisë shqiptare për problemin e Tajvanit.

Ai tha: "Ne shprehim, gjithashtu, qëndrimin e prerë e të vendosur të qeverisë dhe të popullit shqiptar, të Kuvendit të Shqipërisë, që ne njohim vetëm një Kinë dhe Tajvanin e quajmë si pjesë të saj. Në këtë problem nuk kemi pasur dhe nuk kemi asnjë lëkundje." 

Zotit Servet Pëllumbi i kanë lënë përshtypjen më të thellë sukseset e arritura nga Kina, suksese që ai ka parë nga afër gjatë vizitës në zona të posaçme ekonomike në Dalian dhe në Shangai. Ai tha plot emocion se të gjitha sukseset e këtyre zonave të zhvillimit janë si rezultati i politikës së reformës e hapjes në Kinë.

Ai tha: "Ne patëm raste gjithashtu të vizitojmë disa zona të posaçme të zhvillimit ekonomik, ku ne vumë re dhe pamë me sytë tanë një progres me të vërtetë shumë të madh si rezultati i një politike investimesh intensive në zonat e lira të taksave dhe, në të njëjtën kohë, shumë investime të huaja, të cilat kanë ardhur në rritje nga njëri vit në tjetrin. Ne pamë pikërisht se përvojat e këtyre zonave në zhvillimin ekonomik, janë përvoja të reja, që tashmë veprojnë edhe në zona të tjera të zhvillimit ekonomik të vendit."

Ai tha, gjithashtu, se në këto zona zhvillimi ka tre komponente të rëndësishme që bashkëveprojnë me njëri tjetrin: teknologjia moderne bashkëkohore, synimi për të ngritur mirëqienien e popullit nëpërmjet krijimit të zonave urbane, të zonave të gjelbërta për banim, për argëtim, që të gjitha këto të harmonizuara në një politikë të qartë konsekuente zhvillimi të zonave të posaçme dhe gradualisht të gjithë Kinës.

Ai shprehu edhe urime të sinqerta për sukseset kolosale të Republikës Popullore të Kinës në të ardhmen.

Gjatë intervistës me kërkesën e korrespondentes sonë, z. Servet Pëllumbi, tha fjalë zemre se me gjithë moshën e madhe në postin e punës së shenjtë shtetërore, ai sigurisht përpiqet të jetë sa më aktiv dhe të jetë në krye të detyrës. Në të njëjtën kohë, ai i foli edhe për të ardhmen e popullit shqiptar. Ai tha: "Populli shqiptar, gjithashtu, po përpiqet në rrugën e vet që të zhvillohet, të përparojë në rrugën e demokracisë, në synimin e integrimit në strukturën Euro-Atlantike. Tani janë duke u zhvilluar negociatat për marrëveshjen e 'Stabilizim-asociimit'. Në përgjithësi, ka një frymë pune mobilizimi, e në mënyrë të veçantë, po vihet në dukje një inisiativë private, e cila ka marrë një gjallëri të posaçme, sidomos me reformat që janë bërë në Shqipëri. Dhe shpresojmë që gradualisht edhe Shqipëria të zhvillohet në një vend të zhvilluar e të integruar në strukturat Euro-Atlantike dhe, më gjërë, botërore."

Më poshtë z. Servet Pëllumbi foli edhe për marrëdhëniet e bashkëpunimit dypalësh. Ai tha se Kina është një vend i madh, një vend mik për Shqipërinë, i cili edhe deri tani ka treguar një interes për investimet në Shqipëri dhe për marrëdhëniet tregtare me Shqipërinë. Vitin e kaluar, këto marrëdhënie tregtare arritën në mbi 30 milionë dollarë amerikanë, por nga bisedimet që patëm ne, tha ai, del se ka shumë sektorë dhe shumë fusha të bashkëpunimit, që mund të zgjerohen në të ardhmen, pra, perspektiva e zhvillimit të marrëdhënieve midis Shqipërisë dhe Kinës është shumë e mirë.

Në fund të intervistës së tij, kryetari i Kuvendit të Shqipërisë z.Servet Pëllumbi e vlerësoi punën e Radios së Jashtme të Kinës në gjuhën shqipe. Ai tha:

"Ju po bëni një punë të lavdërueshme, për të transmetuar emisionet në gjuhën shqipe. Por nuk është vetëm kjo, ju personalisht keni dhënë një kontribut shumë me vlerë, në përgjithësi, edhe si albanologe edhe si njohëse e mirë e gjuhës shqipe, por edhe me dashurinë e respektin e madh që keni treguar për shqiptarët që kanë ardhur këtu nga Shqipëria dhe që vazhdojnë të vijnë. Shqiptarët jo rastësisht ju quajnë Drita. Drita është një emër i bukur, që ju e meritoni plotësisht me punën, me sjelljen tuaj dhe me përkushtimin tuaj. Unë ju uroj juve dhe familjes suaj suksese, shëndet, jetë të gjatë dhe të gjitha të mirat! Falëminderit!"

Korrespondentja jonë Damini e falënderoi shumë kryetarin e Kuvendit të Shqipërisë për komplimentet dhe urimet e tij dhe, gjithashtu, i uroi shëndet të plotë, lumturi në familje dhe të gjithë të mirat!

Të dashur lexues, lexuat intervistën e kryetarit të Kuvendit të Shqipërisë zotit Servet Pëllumbi, dhënë korrespondentes së Radios sonë Hë Da Ming gjatë vizitës në Kinë. ( Daming )