P. Prokuror i Përgjithshëm i Shqipërisë, Theodhor Sollaku, siç e di unë, kjo është vizita e parë e një delegacioni të Prokurorisë Shqiptare në Kinë. Si e shikoni ju këtë vizitë ?

Pgj. Delegacioni i prokurorisë shqiptare është në RP të Kinës me ftesë të Prokurorisë së Lartë Popullore të Kinës. Ne diskutuam për probleme të ndryshme që u interesojnë dy prokurorive, të Kinës dhe të Shqipërisë dhe dua të them, që në fillim, se vizita është shprehje e asaj miqësie të lashtë që ekziston midis dy popujve dhe dy vendeve tona. Sivjet është 55 vjetori i vendosjes së marrëdhënieve diplomatike dhe pavarësisht nga oshilacionet e historisë në marrëdhëniet politike midis dy shteteve, unë do të thosha se miqësia midis dy popujve asnjëherë nuk ka munguar, përkundrazi, ajo ka qenë prezente. Krahas këtij momenti, të rikonfirmimit edhe një herë të miqësisë së dy popujve, unë do të thoshë që vizita e delegacionit të prokurorisë shqiptare, lidhet me momente të tjera të bashkëpunimit. Pavarësisht nga sisteme të ndryshme të procedimeve penale, qëllimi i përbashkët i prokurorisë shqiptare dhe i saj kineze është lufta kundër krimit, në përgjithësi, dhe, në veçanti, atij të organizuar dhe terrorizmit. Pavarësisht se të dyja vendet tona ende nuk janë prekur nga veprimet terroriste, është e rëndësishme që lufta kundër krimit të organizuar, të jetë eficente, me qëllim që të mos lerë shteg për të gjallëruar tendencat terroriste. Ne shkëmbyem mendime të ndryshme, lidhur me organizimin e dy zyrave në vendet tona. Morëm eksperiencë nga njëri-tjetri. Natyrisht kjo është vizita e parë e një delegacioni të prokurorisë shqiptare në Kinë, por do të nuk jetë e fundit. Së bashku me homologët tanë kinezë, ne ndajmë të njëjtin mendimin që, në të ardhme, ky bashkëpunim të forcohet, që vizitat reciproke të dy prokurorive i shërbejë më tej forcimit të marrëdhënieve midis dy popujve, dy vendeve tona dhe dy institucioneve tona që kanë mision luftën kundër krimit. Unë ftova në Shqipëri për një vizitë zyrtare si prokurorin e përgjithshëm të Republikës Popullore të së Kinës, ashtu edhe prokurorin e Shangait. Shpresoj që vizita e tyre të realizohet brenda një kohe sa më të shkurtër.

P. Gjatë vizitave në Pekin dhe Shangai, ç'u bëri më shumë përshtypje ?

Pgj. Unë do të thosha që kishim dëgjuar shumë për përparimet që kishte bërë Republika Popullore e Kinës. Por me sytë tanë i pamë vërtet se këto arritje ishin madhështore, ashtu siç është një popull i tërë kinez madhështor, ashtu siç është Kina një vend madhështor. Nga përvoja kineze populli shqiptar ka për të mësuar shumë. Në rradhë të parë, faktin se çdo gjë arrihet nëpërmjet punës. Edhe ky virtyt që ekziston tek populli kinez është për t'u marrë shembull nga populli shqiptar. Neve ende jemi populli përgjithësisht i varfër. Por ne duhet të kuptojmë që vetëm me punë mund arrijmë suksese. Kishim dëgjuar për Shangain se ishte një metropol i rëndësishëm, i zhvilluar si vendet e perëndimit apo Amerika. Por me sy tanë e pamë që vërtet ishte më shumë se ç' kemi menduar.

P. Këto ndryshime të Kinës që i patë këtu nga afër, a i dinit më parë ?

Pgj. Kishim dëgjuar për ndryshimet, por nuk i mendonim se do ishin të këtij niveli, veçanërisht në Shangai. Pamë ndërtime shumëkatëshe, një urbanistikë të mrekullueshme, një industri, një bujqësi, një sistem bankar financiar tepër të zhvilluar. Është një qytet, një rajon për t'u marrë shembull nga gjithë vendet e tjera, bile edhe nga Shqipëria.

P. Unë e di se si Prokuror i Përgjithshëm i Shqipërisë, ju keni qenë për vizitë ose keni marrë pjesë në konferenca ndërkombëtare në vende të ndryshme të botës. Ç'mund të thosni Kinën duke e krahasuar me këto vende ?

Pgj. Unë do të thoja se nuk kam ndonjë mendim që Kina apo vende të tjera ndryshojnë nga njera tjetra. Unë do të thoja se Kina është në rrugë të mbarë. Institucionet e saj funksinojnë për të realizuar misionin që ajo ka në luftën kundër krimit. Ashtu siç bëjnë shumë shtete të tjera të Europës, apo të Amerikës.

P. Mirë dhe tani a mund të na thoni diçka lidhur me emisionin e Radios së Jashtme të Kinës dhe me gazetën që kemi botuar në gjuhën shqipe?

Pgj. Unë diçka kam lexuar nga gazeta që keni botuar juve. Ju uroj suksese të mëtejshme në misionin tuaj për të informuar publikun që njeh gjuhën shqipe, me arritjet e Republikës Popullore të Kinës, pse jo dhe me ato të Shqipërisë.

Shumë falenminderit !

Ju lutem !