Në një konferencë shtypi që u organizua, më 25 mars, në Pekin, zëdhënësi i Ministrisë së Punëve të Jashtme të Kinës Kun Qyen tha se gjatë vizitës në Korenë e Veriut, ministri i jashtëm Li Zhao Xin arriti unanimitet të gjerë mendimi me palën koreane dhe vizita e tij qe plotësisht e suksesshme.

Kun Qyeni tha se gjatë vizitës në Korenë e Veriut, Li Zhao Xini ka zhvilluar një sërë bisedimesh dhe takimesh të rëndësishme me sekretarin e përgjithshëm të Partisë së Punës të Koresë së Veriut dhe kryetar i Këshillit të Mbrojtjes Kombëtare Kim Jong Il dhe me liderë të tjerë të palës koreane. Temat e diskutimeve dypalëshe kanë prekur marrëdhëniet dypalëshe, problemin bërthamor të gadishullit korean, probleme rajonale dhe ndërkombëtare të interesit të përbashkët etj.

Kun Qyeni tha gjithashtu se Kina shkëmbeu mendime me palët e tjera të ndryshme, duke përfshirë Korenë e Veriut, lidhur me dokumente të konceptimit të grupit të punës të bisedimeve 6 palëshe. Pala kineze do të zhvillojë diskutime të mëtejshme me palët e tjera të ndryshme dhe do të përpiqet të bëjë sa më parë mbledhjen e grupit të punës për zhvillimin në fund të qershorit të këtij viti të bisedimeve 6 palëshe të rundit të tretë.

Në këtë konferencë shtypi, zëdhënësi i Ministrisë së Punëve të Jashtme të Kinës Kun Qyen shpalli se nga 31 mars deri më 1 prill, ministri i jashtëm i Kinës Li Zhao Xin do të marrë pjesë në konferencën ndërkombëtare mbi problemin e Afganistanit që do të mbahet në Berlin.

Kun Qyeni tha se Kina përkrah gjithmonë dhe merr pjesë aktivisht në procesin e paqes dhe rindërtimit të Afganistanit. Në këtë konferencë, ministri i jashtëm Li Zhao Xini do të shtjellojë mendimet dhe qëndrimin e qeverisë kineze për problemin e Afganistanit dhe do të shpallë masat e qeverisë kineze për ndihmat për Afganistanin. (Sihai)